జాతీయ గీతాలాపన ఎప్పుడు చేసినా మనసు గర్వంతో ఉప్పొంగిపోతుందన్నాడు క్రికెట్ లెజెండ్ సచిన్ టెండూల్కర్. ఆదివారమిక్కడ జరిగిన ది స్పోర్ట్స్ హీరోస్ ఆల్బమ్ విడుదల కార్యక్రమంలో సచిన్ పాల్గొన్నాడు. ఈ సందర్భంగా మాట్లాడుతూ.. 2011 ప్రపంచకప్ ఫైనల్ ప్రారంభానికి ముందు కిక్కిరిసిన వాంఖడే స్టేడియం మధ్యలో నిలబడి జాతీయ గీతం ఆలపిస్తున్నప్పుడు కలిగిన అనుభూతి ఎప్పటికీ మరువలేనిదని చెప్పాడు. అందరూ కలిసి జాతీయ గీతాలాపన చేస్తే ఆ అనుభూతి మరో స్థాయికి చేరుతుంది. ఇలాంటి అనుభావాలు నాకు రెండు ఉన్నాయి. 2003 ప్రపంచకప్‌లో పాకిస్థాన్‌తో సెంచూరియన్ స్టేడియంలో జరిగిన వన్డేలో 60 వేల మంది కలిసి జన గణ మన అంటూ పాడిన సందర్భం ఒకటైతే, మరొకటి 2011 ప్రపంచకప్ ఫైనల్లో.ఆ రెండు సందర్భాల్లో నాకు కలిగిన అనుభూతి నేను మునుపెన్నడూ అనుభవించనిది. వ్యక్తిగతంగా ఎన్ని విజయాలు సాధించినా, జాతీయ గీతాలపనతో కలిగే ఆ అనుభూతికి సరిరావు అని సచిన్ పేర్కొన్నాడు.