యూఏఈ:పార్కింగ్ ఫీజుల నుంచి ప్రజలకు మినహాయింపులు ఇచ్చినా..అబుధాబి వాహనదారులు రోడ్లపై అడ్డదిడ్డంగానే వాహనాలను పార్క్ చేస్తున్నారు. పార్కింగ్ స్థలాల్లో ఓ పద్దతిగా పార్కింగ్ చేసే అవకాశాలు ఉన్నా..అవేం పట్టించుకోకుండా రోడ్ల పక్కనే వాహనాలను పార్క్ చేస్తూ తోటి వాహనదారులను ఇబ్బందుల పాలు చేస్తున్నారు.  కరోనా వైరస్ నేపథ్యంలో ఆర్ధిక ఒడిదుడుకులు ఎదుర్కుంటున్న ప్రజలకు పార్కింగ్ ఫీజులను రద్దు చేసిన విషయం తెలిసిందే. ఫీజులు రద్దు చేసినా..పార్కింగ్ సర్వీసులను వాహనదారులు దుర్వినియోగం చేస్తున్నారని అబుధాబి మున్సిపాలిటిలోని సమీకృత రవాణా కేంద్రం అధికారులు అంటున్నారు. ఇక నుంచి అలాంటి వారిపై కఠిన చర్యలు తీసుకుంటామని హెచ్చరించారు. పార్కింగ్ నిబంధనలు ఉల్లంఘిస్తే భారీగా జరిమానా విధిస్తామని తెలిపారు. నిషేధిత ప్రాంతంలో పార్క్‌ చేసినా, వాహనాల వెనక, ముందు భాగంలో కార్లను నిలిపినా, డబుల్‌ పార్కింగ్ చేసినా జరిమానా తప్పదని వార్నింగ్ ఇస్తున్నారు. నిర్ణీత పార్కింగ్ ప్రదేశాల్లో ఓ క్రమపద్దతిలో వాహనాలను పార్క్‌ చేసుకుంటే అందరికీ ఉపయుక్తంగా ఉంటుందన్నారు.