యూఏఈలోని అన్ని ప్రభుత్వ, ప్రైవేట్‌ స్కూళ్లకు వేసవి సెలవులను ఖరారు చేసింది విద్యా మంత్రిత్వ శాఖ. ముందస్తుగా ప్రకటించినట్లుగానే జులై 2 నుంచి విద్యాశాఖ సిలబస్‌ పాటించే అన్ని స్కూళ్లకు వేసవి సెలవులు ప్రారంభం అవుతాయని తెలిపింది. కరోనా నేపథ్యంలో ఏర్పడిన అంతరాయం కారణంగా వేసవి సెలవులను మార్చబోవటం లేదని కూడా స్పష్టం చేశారు. ముందస్తుగా నిర్ణయించిన షెడ్యూల్‌ ప్రకారమే వేసవి సెలవులు ఉంటాయని స్పష్టం చేసింది. విద్యార్ధులకు జులై 2 నుంచి సెలవులు ప్రారంభం అయితే..స్కూల్‌ స్టాఫ్‌ కు మాత్రం వారం ఆలస్యంగా జులై 9 నుంచి సెలవులు ప్రారంభం అవుతాయని విద్యాశాఖ స్పష్టం చేసింది. ఇక వచ్చే విద్యాసంవత్సరానికి సంబంధించి ఇప్పుడే ఏ నిర్ణయమూ చెప్పలేమని కూడా విద్యాశాఖ అధికారులు చెబుతున్నారు. దీనిపై సెప్టెంబర్‌ లో ఆనాటి పరిస్థితులను సమీక్షించి నిర్ణయం తీసుకుంటామన్నారు. సెప్టెంబర్‌ నాటికి దేశంలో కరోనా తీవ్రతను బట్టి స్కూళ్లను ప్రారంభించాలా? వర్చువల్‌ స్టడీస్‌ కొనసాగించాలా? అనేది నిర్ణయించనున్నట్లు వెల్లడించారు.