మనామా:ప్రభుత్వం నుంచి ఎలాంటి అనుమతులు లేకుండా చట్టవ్యతిరేకంగా నర్సులు, ఫిజియోథెరపిస్ట్ ల నియామకాలను చేపడుతున్న ఓ ఆఫీస్ పై జాతీయ ఆరోగ్య నియంత్రణ అధికారులు తనిఖీలు చేపట్టారు. రాజధాని గవర్నరేట్ పరిధిలో ఓ మహిళ అక్రమంగా రిక్రూట్మెంట్లు చేపడుతున్నట్లు గుర్తించి ఆఫీస్ ను సీజ్ చేశారు.  చట్టవ్యతిరేక కార్యకలాపాలకు పాల్పడిన మహిళ అసియా దేశాలకు చెందిన వ్యక్తిగా గుర్తించారు. తాము సోదాలు నిర్వహించిన సమయంలో సదరు మహిళను రెడ్ హ్యాండెడ్ గా పట్టుబడినట్లు జాతీయ ఆరోగ్య నియంత్రణ అధికార విభాగం అధిపతి డాక్టర్ హెస్స అల్ దొస్సరి వివరించారు. తాము తనిఖీలు నిర్వహించిన సమయంలో కింగ్ డమ్ లో నర్సుగా పని చేసేందుకు ఎలాంటి అనుమతులు లేని ఓ మహిళ నర్సుతో నిందితురాలు డీల్ చేస్తున్నట్లు తెలిపారు. ఆఫీస్ ను సీజ్ చేసి కేసును న్యాయవిచారణకు బదిలి చేసినట్లు వెల్లడించారు. 

--రాజేశ్వర్(మాగల్ఫ్ ప్రతినిధి,బహ్రెయిన్)