కువైట్ సిటీ:కరోనా డ్రగ్స్ 'ఎవిగన్' ను కువైట్ కు సరఫరా చేయనుంది జపాన్. వచ్చే వారంలో కరోనా డ్రగ్స్ తమ దేశానికి చేరుకుంటాయని కువైట్ వైద్య ఆరోగ్య మంత్రిత్వ శాఖ వెల్లడించింది. ఇప్పటికే పలు దేశాల్లో నిర్వహించిన క్లినికల్ ట్రయల్స్ లో సానుకూల ఫలితాలు వచ్చిన నేపథ్యంలో జపాన్ నుంచి ఎవిగన్ ను దిగుమతి చేసుకుంటామని కూడా తెలిపింది. అయితే..మాత్రల సరఫరా వాణిజ్య విలువలకు లోబడి కాకుండా కేవలం మానవతాధృక్పథంతో జపాన్ ఎవిగన్ ను సరఫరా చేస్తోందని కూడా మంత్రిత్వశాఖ వివరించింది. జపాన్ రూపొందించిన మార్గనిర్దేశకాలు, అలాగే ప్రపంచ ఆరోగ్య సంస్థ సూచనల మేరకు మెడిసిన్ ను వినియోగించనున్నారు. జపాన్ నుంచి మెడిసిన్ దిగుమతి చేసుకునేలా విశేషంగా కృషి చేసిన విదేశీ వ్యవహారాల మంత్రిత్వ శాఖ, వైద్య ఆరోగ్యశాఖ అధికారులతో పాటు టోక్యోలోని కువైట్ రాయాబార కార్యాలయ అధికారుల సేవలను ఈ సందర్భంగా కువైట్ ప్రభుత్వం ప్రశంసించింది.