కరోనా నేపథ్యంలో ఇన్నాళ్లుగా నిలిచిపోయిన వాహనాల ఫిట్నెస్ టెస్టులు, సర్టిఫికెట్ల రెన్యూవల్ ప్రక్రియ పున:ప్రారంభం అయ్యాయి. ఇక నుంచి దేశవ్యాప్తంగా అన్ని రాయల్ ఓమన్ పోలీస్ సర్వీస్ సెంటర్లలో 10 ఏళ్ల మించి పాతబడిన వాహనాలకు ఫిట్నెస్ పరీక్షలు నిర్వహించనున్నారు. కరోనా వ్యాప్తి నియంత్రణలో భాగంగా ఓమన్ లో పలు ప్రభుత్వ సేవలు తాత్కాలికంగా నిలిపివేసిన విషయం తెలిసిందే. గత మార్చి 21 నుంచి వాహనాల ఫిట్నెస్ పరీక్షలను కూడా నిలిపివేశారు. రెన్యూవల్ గడువు ముగిసిన వారికి కొద్ది రోజులు మినహాయింపు ఇచ్చారు. ఆన్ లైన్ ద్వారా రెన్యూవల్ చేశారు. అయితే..అన్ లాక్ ప్రక్రియలో భాగంగా ప్రస్తుతం పలు రంగాలకు మినహాయింపు ఇచ్చిన ప్రభుత్వం..ఇక నుంచి వాహనాల ఫిట్నెస్ పరీక్షలు యథావిధిగా నిర్వహించాలని నిర్ణయించింది. ఓమన్ ట్రాఫిక్ నిబంధనల ప్రకారం పదేళ్లకుపైబడిన వాహనాలకు ఫిట్నెస్ పరీక్షలు చేయించి వాహనాలకు మళ్లీ అనుమతి తీసుకోవటం తప్పనిసరి. దీంతో దేశంలోని రాయల్ ఓమన్ పోలీస్ సర్వీస్ సెంటర్లలో వాహనాలకు ఫిట్నెస్ టెస్టులు విధిగా చేయించుకోవాలని అధికారులు కోరారు.