సౌదీ: మదీనాలో చోరీకి పాల్పడిన ఐదుగుర్ని పోలీసులు అరెస్ట్ చేశారు. పట్టుబడిన వారిలో ఇద్దరు సౌదీలు ఉండగా, మరో ముగ్గురు యెమనీ నివాసితులు ఉన్నారు. మదీనాలోని ఓ ఇంట్లో చోరీకి పాల్పడిన నిందితులు 1,50,000 సౌదీ రియాల్స్ తో పాటు 2,00,000 సౌదీ రియాల్స్ విలువైన బంగారు నగలను దొంగిలించినట్లు మదీనా పోలీసులు వివరించారు. నిందితులను పబ్లిక్ ప్రాసిక్యూషన్ కు తరలించి తదుపరి విచారణ చేపట్టినట్లు వివరించారు. ఇదిలాఉంటే మరో చోరీ ఘటనలో ఇద్దరు సౌదీ వ్యక్తులతో పాటు ఓ యెమన్ నివాసితుడ్ని పోలీసులు అరెస్ట్ చేశారు. మదీనాలోని ఓ ఇంట్లో నుంచి 1,80,000 సౌదీ రియాల్స్, 2,00,000 సౌదీ రియాల్స్ విలువైన బంగారు అభరణాలను నిందితులు దోచుకెళ్లిన ఆరోపణల్లో వీరిని అరెస్ట్ చేశారు. నిందితుల నుంచి చోరీ సొత్తును స్వాధీనం చేసుకొని పబ్లిక్ ప్రాసిక్యూషన్ కు తరలించినట్లు వివరించారు.