మస్కట్:ఒమన్ లో ప్రవాసీయుల సంఖ్య గణనీయంగా తగ్గుతోంది. గత నెల రోజులుగా 96 వేల మంది ఒమన్ నుంచి వెళ్లిపోయినట్లు జాతీయ గణాంకాలు, సమాచార కేంద్రం ప్రకటించింది. ఒమనైజేషన్ ప్రభావంతో ఒమన్ స్వదేశీయులతో విదేశీల నిష్పత్తి తగ్గించుకుంటున్న విషయం తెలిసిందే. ఆగస్ట్ 15, 2020 నాటికి జాతీయ గణాంకాలు, సమాచార కేంద్రం దగ్గర ఉన్న లెక్కల ప్రకారం ఒమన్ జనాభాలో ఒమనీయుల సంఖ్య 60.60 శాతంగా ఉన్నట్లు అధికారులు చెబుతున్నారు. అంటే ప్రస్తుతం ఒమనీయుల సంఖ్య 27,28,724 మంది ఉన్నారు. ఇక ప్రవాసీయుల జనాభా 39.40 (17,75,577) శాతం ఉన్నట్లు ఎన్సీఎస్ఐ స్పష్టం చేసింది. ఇదిలాఉంటే జులై 21 నాటికి ప్రవాసీయుల సంఖ్య 18,72,170 (40.08శాతం) మంది ఉన్నట్లు వెల్లడించింది. అంటే ఈ ఒక్క నెలలోనే 96 వేల మంది ప్రవాసీయులు ఒమన్ విడిచి వెళ్లినట్లు ఎన్సీఎస్ఐ ప్రకటించింది.