మస్కట్:ఒమన్ రెసిడెన్సీ వీసాదారులు దేశం విడిచి 6 నెలలు దాటినా..కొన్ని ప్రత్యేక మినహాయింపులతో తిరిగి వచ్చేందుకు అవకాశం కల్పించింది ఆ దేశ ప్రభుత్వం. రాయల్ ఒమన్ పోలీసుల నుంచి మినహాయింపు పొందినట్లు అనుమతి పొంది తిరిగి రావొచ్చని స్పష్టం చేసింది. సుల్తానేట్ వెలుపల ఉండి 180 రోజులు దాటితే యజమానిగానీ, కార్మికులుగానీ మినహాయింపు పొందేందుకు పాస్ పోర్ట్, రెసిడెన్సీ సాధారణ పరిపాలనా విభాగంలోని ఆర్ధిక వ్యవహారాలు, పరిపాలన విభాగం అధికారులకు ముందుగా ఓ దరఖాస్తు చేసుకోవాలి. అయితే..దరఖాస్తుదారుడి పాస్ పోర్టు ఖచ్చితంగా ఇంకా చెల్లుబాటులో ఉండాలి. పాస్ పోర్టు కాపీ లేదా యజమానిగానీ, కార్మికుడికి చెందిన ఐడీ కార్డు కాపీ జతపర్చాలి. వాణిజ్య రిజిస్ట్రేషన్ పేపర్ కాపీ, కంపెనీ అధికారిక ముద్రతో కూడిన కాపీని దరఖాస్తుతో జతపరచాల్సి ఉంటుంది. వీటికితోడు 14 రోజుల తర్వాత తిరిగి వెళ్లేందుకు వీలుగా తీసుకునన రిటర్న్ టికెట్ ను కూడా జతపరచాల్సి ఉంటుంది. కోవిడ్ కారణంగా విదేశాల్లో చిక్కుకుపోయిన ప్రవాసీయులు తిరిగి వచ్చేందుకు వీలుగా ఈ ప్రత్యేక వెసులుబాటు కల్పించినట్లు రాయల్ ఒమన్ పోలీసులు వెల్లడించారు. 

--లెనిన్ కుమార్(మాగల్ఫ్ ప్రతినిధి,ఒమన్)