కువైట్ సిటీ:ఆగస్ట్ చివరి నాటికి వీసా గడువు ముగిసే వారికి గుడ్ న్యూస్ అందించింది కువైట్ ప్రభుత్వం. ప్రవాసీయులు, పర్యాటకులకు సంబంధించి రెసిడెన్సీ, వీసా గడువును మరో మూడు నెలలు పెంచుతున్నట్లు కువైట్ అంతర్గత మంత్రిత్వ శాఖ ప్రకటించింది. అయితే..ఈ వెసులుబాటు కేవలం కువైట్ లో ఉన్నవారికి మాత్రమే అని కూడా మంత్రిత్వ శాఖ స్పష్టం చేసింది. దీంతో ఆగస్ట్ 31 నాటికి గడువు ముగిసే వీసాలు నవంబర్ 30 వరకు చెల్లుబాటులో ఉంటాయి. అయితే..ఈ లోగానే ప్రవాసీయుల స్పాన్సర్లు, యజమానులు వారి వీసాలను రెన్యూవల్ చేయాలని మంత్రిత్వ శాఖ సూచించింది. ఆన్ లైన్ ద్వారాగానీ, రెసిడెన్సీ వ్యవహారాల కార్యాలయాల్లోగానీ వీసాలను రెన్యూవల్ చేసుకోవచ్చని తెలిపింది. మరోవైపు దేశంలో చిక్కుకుపోయిన పర్యాటకులు సైతం నవంబర్ 30 నాటికి తిరుగు ప్రయాణంలో అయ్యేలా ఏర్పాట్లు చేసుకోవాలని కువైట్ అంతర్గత మంత్రిత్వ శాఖ కోరింది.