ఖతార్ ప్రభుత్వ స్థానిక నిరుద్యోగులకు శుభవార్త అందించింది. ప్రభుత్వ, ప్రైవేట్ రంగాల్లో 4,800 ఉద్యోగావకాశాలను కల్పిస్తున్నట్లు పరిపాలనా అభివృద్ధి, కార్మిక, సాంఘికాభివృద్ధి మంత్రిత్వ శాఖ ప్రకటించింది. ప్రభుత్వ, ప్రైవేట్ రంగాల్లోని ఖాళీల భర్తీకి జాతీయ ఉపాధి వేదిక కవదార్ ద్వారా దరఖాస్తులను ఆహ్వానిస్తున్నట్లు, సెప్టెంబర్ 7 నుంచి నిరుద్యోగులు అప్లై చేసుకోవచ్చునని వెల్లడించింది. ఇక నుంచి ఆయా శాఖల అధికారులతో ఎప్పటికప్పుడు సమన్వయం చేసుకుంటూ ఉద్యోగాల జాబితాను సిద్ధం చేస్తామని, కవదార్ ద్వారా ఖాళీలను భర్తీ చేసే ప్రక్రియ నిరంతరం కొనసాగుతుందని తెలిపింది. ప్రస్తుత ఖాళీల భర్తీకి ఇంటర్వ్యూ ప్రక్రియను వేగవంతం చేస్తామని కూడా మంత్రిత్వ శాఖ వివరించింది. అయితే...ఉద్యోగాల కోసం అప్లై చేసుకునే వారు తమ పేరు మీద ఉన్న ఫోన్ నెంబర్లను దరఖాస్తులో పేర్కొంటే.. రిజిస్ట్రేషన్ ప్రక్రయ వేగవంతం చేయటం సులభం అవుతుందని తెలిపింది. రవాణా, సమాచార మంత్రిత్వ శాఖలోని నేషనల్ అథంటికేషన్ సిస్టం ద్వారా రిజిస్ట్రేషన్ ప్రక్రియను వేగవంతంగా నిర్వహించేలా చర్యలు తీసుకుంటున్నట్లు మంత్రిత్వ శాఖ అధికారులు వివరించారు. ఇదిలాఉంటే స్థానికులకు ఉద్యోగాలు కల్పించాలనే ఉద్దేశంతో జాతీయ ఉపాధి వేదిక కవదార్ ను గత సోమవారం ప్రారంభించిన విషయం తెలిసింది. కవదార్ ద్వారా ఖతార్ పౌరులు, ఖతార్ మహిళలకు కలిగిన సంతానానికి ప్రభుత్వ, ప్రైవేట్ రంగాల్లో వారి అర్హతకు అనుగుణంగా ఉద్యోగాలు కల్పిస్తున్నారు.