మస్కట్:ప్రవాసీయుల ఉపాధికి మరో గండం పొంచి ఉంది. ఒమనైజేషన్ లో భాగంగా స్థానికులకు ఉద్యోగవకాశాలను మరింత మెరుగుపరిచే దిశగా ఒమన్ కార్మిక మంత్రిత్వ శాఖ కసరత్తు ముమ్మరం చేసింది. ఇందులో భాగంగా పలు ఇండస్ట్రియల్ జోన్, సోహర్ ఇండస్ట్రియల్ పోర్ట్ లో పర్యటించిన కార్మిక శాఖ అధికారులు..పలు ప్రైవేట్ సంస్థల్లో ఒమనీయులను భర్తీ చేసే అవకాశాలు, కొత్త ఉద్యోగాల కల్పించటంపై చర్చించారు. ఉత్తర అల్ బటినా గవర్నరేట్ పరిధిలోని OQ గ్రూప్, సోహర్ ఇండస్ట్రియల్ పోర్ట్, వేల్ ఒమన్ కంపెనీ, జిందాల్ షేదీడ్ ఐరన్ అండ్ స్టీల్ కంపెనీ, అలాగే మజన్ ఎలక్ట్రిసిటీ కంపెనీలలో పర్యటించారు. మంత్రిత్వ శాఖతో ప్రైవేట్ సంస్థల మధ్య భాగస్వామ్యం, సత్సంబంధాల బలోపేతానికి సంబంధించిన ఫ్రేమ్ వర్క్ పై చర్చించారు. అలాగే ఆయా కంపెనీలలో అవసరమైన కార్మిక శక్తి, ఉద్యోగావకాశాలపైనా డిస్కస్ చేశారు. దీంతో పాటు ప్రభుత్వ, ప్రైవేట్ రంగాల్లోని ఉద్యోగుల మధ్య పరస్పర సహకారం బలోపేతంపై కూడా కార్మిక మంత్రిత్వ శాఖ అధికారులు చర్చించారు.