సౌదీ:కరోనా నిబంధనలను పాటించటంలో విఫలమైన 366 షాపులను మూసివేసినట్లు సౌదీ గృహనిర్మాణ, మున్సిపల్, రూరల్ అఫైర్స్ మంత్రిత్వ శాఖ వెల్లడించింది. వైరస్ ను అరికట్టేందుకు ప్రతి ఒక్కరు బాధ్యతగా నడుచుకోవాలని..ముఖ్యంగా వ్యాపార సంస్థలు, షాపు నిర్వాహకులు ప్రభుత్వం సూచించిన మార్గనిర్దేశకాలను తప్పనిసరిగా పాటించాలని మంత్రిత్వ శాఖ కోరింది. యాంటీ కరోనా వైరస్ ప్రయత్నాలకు విఘాతం కలిగించేలా వ్యవహరించిన ఏ ఒక్కరిని ఉపేక్షించబోమని హెచ్చరించింది. నిబంధనలను పకడ్బందీగా అమలు చేసేందుకు కింగ్డమ్ వ్యాప్తంగా 24,066 షాపులు, అహార సంస్థలు, ప్రజా మార్కెట్లలో తనిఖీలు చేపట్టినట్లు మంత్రిత్వ శాఖ అధికారులు వెల్లడించారు. తమ తనిఖీల్లో 1,226 చోట్ల ఉల్లంఘనలను గుర్తించినట్లు తెలిపారు. ఉల్లంఘన తీవ్రతను బట్టి కోవిడ్ రూల్స్ బ్రేకర్స్ పై చర్యలు చేపట్టామని..366 షాపులను మూసివేశామని వివరించారు.