ప్రస్తుతం ఇండస్ట్రీలో నడుస్తున్న ట్రెండ్ హరర్‌ కామెడీ. ఈ సినిమాలకు ప్రేక్షకుల నుండి మంచి స్పందన లభిస్తుండగా, సీనియర్‌ హీరోలు కూడా ఈ జానర్‌ సినిమాలపై ప్రత్యేక శ్రద్ద చూపుతున్నారు. వెరైటీ రోల్స్ కు కేరాఫ్‌ అడ్రెస్ అయిన కమల్ కూడా ఇప్పుడు ఓ దెయ్యాల సినిమాని చేసేందుకు సిద్దమయ్యారు.సకల కళావల్లభుడిగా అశేషజనాదరణ పొందిన కమల్‌ ఇప్పటి వరకు పలు వైవిధ్యమైన పాత్రలలో నటించి అందరి మెప్పు పొందారు. తెలుగు, తమిళం, మలయాళం ఇలా ఒకటేంటి అనేక భాషలలో తన సినిమాలను విడుదల చేస్తూ ప్రేక్షకులకు పసందైన విందు అందిస్తున్నారు కమల్‌ . అయితే ఇటీవల చీకటి రాజ్యం సినిమాతో ముందుకు వచ్చిన కమల్‌ ఆ తర్వాత పలు ప్రాజెక్ట్‌లతో బిజీ అయ్యారు .
అముదీశ్వర్‌ 'మీంకుజాంబం మన్‌ పానయుం ' అనే తమిళ చిత్రాన్ని తెరకెక్కిస్తుండగా, ఇందులో మంత్రగాడి పాత్రను కమల్‌ చేయనున్నారు. ఈ పాత్ర చాలా కీలకమైన పాత్ర అని తెలుస్తుంది. ఆత్మలను బంధించే శక్తివంతుడిగా, వాటి విద్యలు తెలిసిన మేధావిగా కమల్‌ పాత్ర ఉండనున్నట్టు సమాచారం. కాళి దాస్ జయరాం, అష్టా జవేరి,ప్రభు, పూజా కుమార్‌ ముఖ్య పాత్రలు పోషిస్తున్న ఈ చిత్రాన్ని శివాజీ గణేశన్‌ మనవడు దుష్యంత్‌ కుమార్‌ నిర్మిస్తున్నారు.