కువైట్:  సబా అల్-సలేం ప్రాంతంలోని మహిళా సెలూన్‌పై త్రిసభ్య కమిటీ దాడి చేసింది.  లైసెన్స్ లేకుండా సెలూన్‌ నిర్వహిస్తున్నందుకు యజమానిని అరెస్ట్ చేసి పబ్లిక్ ప్రాసిక్యూషన్‌కు తరలించినట్లు అధికారులు తెలిపారు. ఆరోగ్య మంత్రిత్వ శాఖలోని సివిల్ మెడికల్ సర్వీసెస్ అఫైర్స్ అసిస్టెంట్ అండర్ సెక్రటరీ డా. ఫాతిమా అల్-నజ్జర్ మాట్లాడుతూ.. మహిళా సెలూన్‌లో లైసెన్స్ లేని ఫిలిపినో వర్కర్ ని నియమించుకున్నారని, లేజర్ వంటి లైసెన్స్ లేని పరికరాలను ఉపయోగిస్తున్నారని ప్రకటించారు. అలాగే ఆరోగ్య మంత్రిత్వ శాఖ లైసెన్స్ లేని మెడిసిన్స్, ఆంపౌల్స్ పదార్థాలు వంటి వాటిని వాడుతున్నట్లు గుర్తించామన్నారు. ఆరోగ్య మంత్రిత్వ శాఖ – ఆరోగ్య లైసెన్సింగ్ విభాగం, ఔషధాల తనిఖీ విభాగం, అంతర్గత మంత్రిత్వ శాఖ, మానవశక్తి కోసం పబ్లిక్ అథారిటీ ప్రతినిధులతో కూడిన త్రిసభ్య కమిటీ ప్రయత్నాలను ఈ సందర్భంగా డాక్టర్ అల్-నజ్జర్ ప్రశంసించారు.