‘మా సినిమాని బాయ్‌కాట్ చేసుకోండి..’ అంటూ ‘లైగర్’ ప్రమోషన్లలో విజయ్ దేవరకొండ చేసిన వ్యాఖ్యల కారణంగానే ‘లైగర్’ సినిమా ఫ్లాప్ అయ్యిందనీ, విజయ్ ఆటిట్యూడ్ వల్లనే ధియేటర్లకు జనం రావడం లేదనీ, దాంతో మేం దారుణంగా నష్టపోయామనీ ముంబయ్‌లో ఓ సీనియర్ ధియేటర్ యజమాని మనోజ్ చేసిన వ్యాఖ్యలు ఇటీవల పెద్ద దుమారం రేపిన సంగతి తెలిసిందే.

విజయ్ ఆటిట్యూడ్‌ని తప్పు పడుతూ, అహంకారి అంటూ అభివర్ణించారు సదరు ధియేటర్ యజమాని మనోజ్. ఈ వ్యాఖ్యలు సోషల్ మీడియాలో హాట్ టాపిక్‌ అయ్యాయ్. దాంతో తాజాగా విజయ్ దేవరకొండ సదరు ధియేటర్ యజమానిని కలిశారు.

తన మాటలను అపార్ధం చేసుకున్నారనీ, తన వుద్దేశ్యం అది కాదనీ వివరణ ఇచ్చుకున్నారు. దాంతో, విజయ్‌ని అర్ధం చేసుకున్న మనోజ్, విజయ్‌కి క్షమాపణలు తెలిపారు. తన మాటల్ని వెనక్కి తీసుకుంటున్నట్లుగా ప్రకటించారు. అంతేకాదు, విజయ్ చాలా మంచి వ్యక్తి అనీ, విజయ్ ఫ్యూచర్ బాగుండాలని కోరుకుంటున్నాననీ మనోజ్ ఓ ఇంటర్వ్యూలో తెలిపారు. 

విజయ్‌ దేవరకొండని స్టార్‌గా నిలబెట్టిందే అతని ఆటిట్యూడ్. ఆ ఆటిట్యూడే ఆయనకు అంతలా ఫాలోయింగ్ తెచ్చిపెట్టింది. అదే ఆటిట్యూడ్ ఇప్పుడు విజయ్ దేవరకొండ కొంప ముంచేసిందంటూ, ఈ వ్యాఖ్యలతో విజయ్ యాంటీ ఫ్యాన్స్ కొందరు ట్రోల్ చేశారు. తాజా ఎపిసోడ్‌తో ఆ ట్రోల్స్‌కి చెక్ పడడంతో పాటూ, విజయ్‌పై పడిన మచ్చ కూడా తొలిగిపోయినట్లైంది.