జెడ్డా: టూరిస్ట్ వీసా హోల్డర్లు హజ్ సీజన్‌లో ముందస్తుగా హజ్ చేయడానికి లేదా ఉమ్రాను చేయడానికి అనుమతించదని, ఈ మేరకు పర్యాటక వీసా నిబంధనలకు సవరణ చేసినట్లు సౌదీ పర్యాటక మంత్రిత్వ శాఖ స్పష్టం చేసింది. కొత్తగా సవరించిన టూరిస్ట్ వీసా విధానం ప్రకారం.. పర్యాటకులు సౌదీలో ఉన్న సమయంలో నిబంధనలు, భద్రతా సూచనలను పాటించవలసి ఉంటుందని పేర్కొంది.  అలాగే గుర్తింపు పత్రాలను ఎల్లవేళలా తమవెంట పెట్టుకోవాలని సూచించింది. GCC రెసిడెన్సీని కలిగి ఉన్నవారు ఇ-టూరిస్ట్ వీసాపై సౌదీలోకి ప్రవేశించవచ్చని మంత్రిత్వ శాఖ వివరించింది. రెసిడెన్సీ కనీసం మూడు నెలల పాటు చెల్లుబాటులో ఉండాలని తెలిపింది. అతనితో పాటు వచ్చే ఫస్ట్-క్లాస్ వీసా హోల్డర్ బంధువులకు, వారి స్పాన్సర్‌లతో వచ్చే గృహ కార్మికులకు కూడా వర్తిస్తుందని తెలిపింది. గురువారం సౌదీ అరేబియా GCC దేశాల నివాసితులు evisa కోసం దరఖాస్తు చేసుకోవడానికి.. యూకే, యూఎస్, ఈయూ నివాసితులు వీసా ఆన్ అరైవల్ కోసం దరఖాస్తు చేసుకోవడానికి అనుమతించే కొత్త నిబంధనలను ప్రకటించిన విషయం తెలిసిందే.