కువైట్: సభాన్ ప్రాంతంలో శుక్రవారం సాయంత్రం మురుగునీటి మ్యాన్‌హోల్‌లో పడిన కార్మికుడిని సెర్చ్ అండ్ రెస్క్యూ సెంటర్ సిబ్బంది వెలికితీశారని జనరల్ ఫైర్ సర్వీస్ డైరెక్టరేట్ పబ్లిక్ రిలేషన్స్ అండ్ మీడియా విభాగం తెలిపింది. వర్షాకాలానికి సన్నాహకంగా ఆరో రింగ్‌రోడ్డులోని సభాన్ ప్రాంతంలో ఉన్న మ్యాన్‌హోల్ మురుగునీటి వ్యవస్థను శుభ్రం చేస్తుండగా.. ఇద్దరు కార్మికులు అందులో పడిపోయినట్లు కేంద్ర ఆపరేషన్స్ విభాగానికి సమాచారం వచ్చిందన్నారు. వెంటనే  అగ్నిమాపక బృందాలు సంఘటనా స్థలానికి చేరుకున్నాయని, మ్యాన్‌హోల్ వెలుపల ఉన్న కార్మికులలో ఒకరు అపస్మారక స్థితిలో ఉన్నట్లు గుర్తించి ప్రథమ చికిత్స అందించారని తెలిపారు. అలాగే మ్యాన్‌హోల్‌లో ఉన్న మరో వ్యక్తి మృతదేహాన్ని బయటకు తీసి ఫోరెన్సిక్‌కు అప్పగించినట్లు జనరల్ ఫైర్ సర్వీస్ డైరెక్టరేట్ తెలిపింది.