మస్కట్: FIFA వరల్డ్ కప్ ఖతార్ 2022 కోసం కార్వా మోటార్స్ తన 100వ బస్సు ఉత్పత్తిని ప్రారంభించింది. దుక్మ్ (సెజాడ్)లోని స్పెషల్ ఎకనామిక్ జోన్‌లోని కార్వా మోటార్స్ కర్మాగారంలో ఇందుకు సంబంధించిన వేడుకను ఘనంగా నిర్వహించారు. ఈ సందర్భంగా కార్వా మోటార్స్ సీఈవో డాక్టర్ ఇబ్రహీం అలీ అల్ బలూషి మాట్లాడుతూ.. ఇది కంపెనీ 2022 ప్లాన్‌లో ఒక మైలురాయిగా నిలిచిందన్నారు. ఇప్పటి వరకు 88 బస్సులను ఖతార్‌కు ఎగుమతి చేశామని, ప్రస్తుతం అక్టోబర్ మధ్య నాటికి మరో 12 బస్సులను ఎగుమతి చేసేందుకు ప్లాన్ చేస్తున్నామని అల్ బలూషి తెలిపారు. FIFA వరల్డ్ కప్ ఖతార్ 2022 నిర్వహణలో కార్వా మోటార్స్ వాహనాలు సేవలు అందిస్తాయన్నారు.