బహ్రెయిన్: తండ్రి ఖాతా నుండి డబ్బు దొంగిలించిన 16 ఏళ్ల బహ్రెయిన్ కుర్రాడికి కోర్టు ఆరు నెలల జైలుశిక్ష విధించింది. కోర్టు ఫైల్స్ ప్రకారం.. తల్లిదండ్రులు వేరుగా ఉన్న బాలుడు.. అతని తండ్రి ఖాతా నుండి BD11,000 కంటే ఎక్కువ దొంగిలించినట్లు అభియోగాలు మోపారు. రిఫార్మ్ అండ్ రిహాబిలిటేషన్ సెంటర్ నివేదిక ఆధారంగా అతని కేసును మూడు నెలల తర్వాత కోర్టు సమీక్షిస్తుంది. అయితే, ఈ నేరంలో బాలుడితో పాటు నిందితురాలిగా ఉన్న బాలుడి తల్లిని కోర్టు నిర్దోషిగా ప్రకటించింది. తన కొడుకు బెనిఫిట్‌పే ఖాతా నుండి డబ్బును బదిలీ చేశాడని తన కుమారుడి స్నేహితుడి నుండి కాల్ వచ్చిన తర్వాత ఫిర్యాదు చేశానని బాలుడి తండ్రి తెలిపారు. కొడుకు కస్టడీ, భరణం విషయంలో తనకు, తన మాజీ భార్యకు విభేదాలు ఉన్నాయని తండ్రి పోలీసులకు వివరించారు. ఇటీవల తన అబ్బాయి గేమ్స్ ఆడతానని తన ఫోన్ తీసుకున్నాడని, అప్పుడు తన బెనిఫిట్‌పే ద్వారా తన మాజీ భార్యతో సహా అనేక ఖాతాలకు నిధులను బదిలీ చేశాడని వివరించారు. అనంతరం తన ఖతాలో BD14,000 ఉండగా.. BD3,000 మాత్రమే మిగిలిందన్నారు. తమ విచారణలో బాలుడు ఈ నేరానికి పాల్పడినట్లు అంగీకరించినట్లు పోలీసులు తెలిపారు.