కువైట్: సెప్టెంబరు 24 నుండి 30 వరకు గడిచిన ఒక వారంలో కువైట్ రోడ్లపై 1,842 ప్రమాదాలు జరిగాయని ట్రాఫిక్ విభాగం తెలిపింది. దాదాపు 257 ప్రమాదాల్లో వ్యక్తులకు గాయాలు అవ్వగా.. మిగిలిన వాటిల్లో వస్తు నష్టాలు జరిగాయని పేర్కొన్నారు. గత వారం రోజుల్లో సుమారు 26,173 ఉల్లంఘనలను జారీ చేసినట్లు ట్రాఫిక్ విభాగం తెలిపింది. డ్రైవింగ్ లైసెన్స్ లేకుండా వాహనాలు నడిపినందుకు 32 మంది యువకులను అదుపులోకి తీసుకోవడంతోపాటు 43 వాహనాలు, 79 సైకిళ్లను సీజ్ చేశామన్నారు. 44 ఘటనల్లో తీవ్రమైన నేరాలకు పాల్పడిన వారిని ట్రాఫిక్ డిటెన్షన్ సెంటర్‌కు తరలించినట్లు వెల్లడించారు. వివిధ సందర్భాల్లో 18 మంది వాంటెడ్ వ్యక్తులను అరెస్టు చేశామన్నారు. పౌరులు, నివాసితులు అందరూ ట్రాఫిక్ నిబంధనలను పాటించాలని, డ్రైవింగ్ చేసేటప్పుడు జాగ్రత్తగా ఉండాలని జనరల్ డైరెక్టరేట్ ఆఫ్ ట్రాఫిక్ పిలుపునిచ్చింది.