దుబాయ్: అత్యవసర సమయంలో పోలీసు యాప్‌ ద్వారా మహిళలు, పిల్లలు మరింత సులువుగా, వేగంగా సహాయం పొందేందుకు దుబాయ్ పోలీసులు కొత్త ఆప్షన్ ను తీసుకొచ్చారు. ఇది అత్యవసర సమయంలో మహిళలు, పిల్లలకు SOS పంపడానికి వీలు కల్పిస్తుందని దుబాయ్ పోలీస్ స్మార్ట్ అప్లికేషన్స్ డిపార్ట్‌మెంట్ డైరెక్టర్ హెస్సా అల్ బలూషి తెలిపారు. ‘ప్రొటెక్ట్ చైల్డ్ అండ్ వుమన్’ అని పిలువబడే ఈ ఫీచర్‌ను యాప్‌లోని ఒకే క్లిక్‌లో యాక్సెస్ చేయవచ్చన్నారు. ఆపదలో ఉన్న మహిళలు లేదా పిల్లలు యాప్‌లోని ఆప్షన్‌ను మాత్రమే ట్యాప్ చేస్తే సరిపోతుందని, వారు ఉన్న లొకేషన్  ఆటో ట్రేస్ అవుతుందని, తమ కంప్లయిట్ ను నిర్ధారించడానికి ఫిర్యాదుదారు కుడివైపు స్లయిడ్ చేస్తే సరిపోతుందని అల్ బలూషి వివరించారు. ఈ ఫీచర్‌ను దుర్వినియోగం చేయవద్దని ప్రజలను కోరారు. పోలీస్ యాప్ 4 మిలియన్ డౌన్‌లోడ్‌లను సాధించిందని, గత మూడేళ్లలో యాప్‌ ద్వారా 2.1 మిలియన్లకు పైగా ఫిర్యాదులు అందాయన్నారు.