సిరియాలో ఇస్లామిక్‌ స్టేట్‌ ఉగ్రవాదులు ఆధీనంలోకి తీసుకున్న అలెప్పో నగరం, పరిసర ప్రాంతాల్లో వైమానిక దాడులు జరిగాయి. ఈ దాడుల్లో 9 మంది పౌరులు మృతిచెందగా, డజన్ల మంది గాయాలపాలైనట్లు స్థానిక పౌరరక్షణ అధికారులు వెల్లడించారు. సిరియాలోని బ్రిటన్‌కు చెందిన మానవ హక్కుల పరిరక్షణ సంస్థ మాత్రం పది మంది పౌరులు మరణించినట్లు తెలిపింది.అలెప్పో పరిసర ప్రాంతాల్లో బస్టన్‌ అల్‌-ఖసర్‌, అల్‌-మషద్‌ జిల్లాలో యుద్ధ విమానాలు బాంబుల వర్షం కురిపించాయి. మృతుల సంఖ్య పెరిగే అవకాశం ఉందని మానవ హక్కుల సంస్థ పేర్కొంది. సిరియాలో గత కొన్నేళ్లుగా ఇస్లామిక్‌ స్టేట్‌ ఉగ్రవాద సంస్థ ప్రభుత్వానికి వ్యతిరేకంగా పలు ప్రాంతాలను తమ ఆధీనంలోకి తీసుకొని అరాచకాలకు పాల్పడుతున్న సంగతి తెలిసిందే.