యూఏఈ: యునైటెడ్ అరబ్ ఎమిరేట్స్ చమురుయేతర వస్తువులను భారతీయ రూపాయిలలో వ్యాపారం చేయడానికి భారత్‌తో ముందస్తు చర్చలు జరుపుతోందని ఎమిరాటీ విదేశీ వాణిజ్య మంత్రి డాక్టర్ థానీ అల్ జియోదీ తెలిపారు. దావోస్‌లో జరుగుతున్న వరల్డ్ ఎకనామిక్ ఫోరమ్‌లో భాగంగా ఆయన ఒక ఇంటర్వ్యూలో మాట్లాడుతూ.. చమురుయేతర వస్తువులకు సంబంధించి వాణిజ్యాన్ని రూపాయాల్లో జరిపేందుకు భారత్ తో చర్చలు కొనసాగుతున్నాయని, అవి ప్రారంభ దశలో ఉన్నాయని తెలిపారు. వచ్చే ఐదేళ్లలో ద్వైపాక్షిక చమురుయేతర వాణిజ్యాన్ని 100 బిలియన్‌ డాలర్లకు పెంచడమే భారత్‌తో యూఏఈ వాణిజ్య ఒప్పందం లక్ష్యంగా పెట్టుకుందన్నారు. యూఏఈ  గత సంవత్సరం భారతదేశంతో విస్తృత స్థాయి స్వేచ్ఛా వాణిజ్య ఒప్పందంపై సంతకం చేసింది. ఇది చైనాతో పాటు గల్ఫ్ అరబ్ చమురు, గ్యాస్ ఉత్పత్తిదారులకు అతిపెద్ద వాణిజ్య భాగస్వాములలో ఒకటి. దీని కరెన్సీలలో ఎక్కువ భాగం US డాలర్‌తో ముడిపడి ఉన్నాయి.