రాయల్‌ ఒమన్‌ పోలీసుల సూచన మేరకు జ్యువలరీ షాపులు ఇకపై వినియోగదారులకు 'ఐడీ కార్డ్‌' తప్పనిసరి చేశాయి. భద్రతా చర్యల్లో భాగంగానే ఈ విధానాన్ని అమల్లోకి తీసుకువచ్చారు. ఇప్పటివరకు బంగారం మార్పిడి, అమ్మకాల వరకు మాత్రమే వినియోగదారుల్ని ఐడీ కార్డ్‌ కోసం జ్యుయెలరీ షాప్‌లు అడిగేవి. ఇకపై, బంగారం కొనుగోళ్ళకు కూడా ఐడీ కార్డ్‌లు తప్పనిసరిగా ఉండాలి. వరుస ఘటనలతో అప్రమత్తమయ్యామనీ, దొంగతనాల్ని అరికట్టడంలో భాగంగానే ఈ చర్యలు తీసుకుంటున్నామని రాయల్‌ ఒమన్‌ పోలీసు సీనియర్‌ అధికారి వెల్లడించారు. జ్యువలరీ షాపుల్లో దొంగతనాలు పెరగడం బంగారం వర్తకుల్లోనూ ఆందోళన కలిగిస్తోంది. దాంతో రాయల్‌ ఒమన్‌ పోలీసుల సూచన మేరకు కొత్త విధానాన్ని అమల్లోకి తీసుకువచ్చారు. ఈ విధానం పట్ల బంగారు దుకాణాలే కాకుండా వినియోగదారులు కూడా హర్షం వ్యక్తం చేశారు.