ఖతార్‌ ఫ్యూయెల్‌ (వొకోద్‌) అథారిటీస్‌, మొబైల్‌ పెట్రోల్‌ స్టేషన్లను దోహా సిటీ మరియు శివారు ప్రాంతాల్లో ఏర్పాటు చేసేందుకు ముందుకొస్తోంది. ఫ్యూయల్‌ స్టేషన్లు తగినన్ని అందుబాటులో లేకపోవడంతో ఇబ్బందులు పడాల్సి వస్తోందని వాహనదారులు ఫిర్యాదు చేయడంతో ఖతార్‌ ఫ్యూయల్‌ (వొకోద్‌) ఈ నిర్ణయం తీసుకుంది. అతి త్వరలో వీలైనన్ని ఎక్కువ మొబైల్‌ పెట్రోల్‌ స్టేషన్లను ఏర్పాటు చేస్తామనీ, అలాగే ఉన్న పెట్రోల్‌ స్టేషన్ల సంఖ్యనీ పెంచుతామని అన్నారు. పెట్రోల్‌ బంకుల వద్ద విపరీతమైన రద్దీతో వాహనదారులు పడుతున్న ఇబ్బందుల్ని అర్థం చేసుకున్నామని సంస్థ ప్రతినిథులు తెలిపారు. అల్‌ తుమామా మరియు మెసైమీర్‌, అలాగే ఎఫ్‌-రింగ్‌ రోడ్‌ వ్యాప్తంగా పెట్రోల్‌ స్టేషన్లను ఏర్పాటు చేయాలని వాహనదారులు విజ్ఞప్తి చేశారు.