ఇస్లామాబాద్ : పాకిస్థాన్ ప్రధాన మంత్రి షెహబాజ్ షరీఫ్ సిఫారసు మేరకు పార్లమెంటును ఆ దేశాధ్యక్షుడు అరిఫ్ అల్వీ బుధవారం రాత్రి రద్దు చేశారు. పార్లమెంటు పదవీ కాలం ముగియడానికి మూడు రోజుల ముందుగానే షరీఫ్ ఈ సిఫారసు చేశారు. తీవ్ర ఆర్థిక, రాజకీయ సంక్షోభాల నడుమ పార్లమెంటు ఎన్నికలు జరగబోతున్నాయి. పాకిస్థాన్ పార్లమెంటు పదవీ కాలం ఈ నెల 12తో ముగుస్తుంది. అనంతరం ఏర్పడే ఆపద్ధర్మ ప్రభుత్వం 90 రోజుల్లోగా ఎన్నికలను నిర్వహిస్తుంది. షరీఫ్ బుధవారం పార్లమెంటులో మాట్లాడుతూ, తాను పార్లమెంటు రద్దుకు సిఫారసు చేస్తానని తెలిపారు. ఆపద్ధర్మ ప్రధాన మంత్రిని నియమించేందుకు అధికార, ప్రతిపక్షాలతో గురువారం నుంచి చర్చలు ప్రారంభిస్తానని తెలిపారు.