ఆనంద్ దేవరకొండ, వైష్ణవీ చైతన్య జంటగా తెరకెక్కిన చిత్రం ‘బేబీ’ ఇటీవల చిన్న సినిమాగా రిలీజై పెద్ద విజయం సొంతం చేసుకున్న సంగతి తెలిసిందే. సాయి రాజేష్ దర్శకత్వంలో ఈ సినిమా తెరకెక్కింది.

యూట్యూబర్‌గా పాపులారిటీ వున్న వైష్ణవీ చైతన్యకు ఈ సినిమాతో మంచి డెబ్యూ దొరికింది. నార్మల్ లవ్ స్టోరీనే అయినా తెరకెక్కించిన విధానం, యూత్‌ని బాగా కనెక్ట్ చేసింది. దాంతో, ఈ సినిమాకి బాక్సాఫీస్ వద్ద కాసుల పంట పండింది.

ఏదైనా ఒక ఫార్ములా హిట్ అయ్యిందంటే చాలు.. అదే ఫార్మేట్‌లో కొన్నాళ్ల పాటు సినిమాలు వస్తుంటాయ్. లక్కు బాగుంటే సక్సెస్ అవుతుంటాయ్ కూడా. అదే స్ర్టేటజీతో మరో నాలుగు స్టోరీలు సాయి రాజేష్ సిద్ధం చేసి వుంచారట.

అదలా వుంటే, ‘బేబీ’ క్రేజ్ ఇప్పుడు బాలీవుడ్‌కీ పాకినట్లుంది. ఈ సినిమాని హిందీలో రీమేక్ చేసేందుకు సన్నాహాలు జరుగుతున్నాయట. ఇటీవల ఓ సినిమా ఫంక్షన్‌లో ప్రముఖ నిర్మాత అల్లు అరవింద్ ఆ విషయాన్ని స్పష్టం చేశారు.

‘కోట బొమ్మాళి పీఎస్’ నిర్మాత అయిన ఎస్.కె.ఎన్ ఈ సినిమాని హిందీలో నిర్మిస్తున్నట్లు అల్లు అరవింద్ స్పష్టం చేశారు. అయితే డైరెక్టర్, నటీనటులు ఎవరన్న వివరాలు తెలియాల్సి వుంది.