యూఏఈ:  అన్ని పబ్లిక్ బస్సులకు ఛార్జీలను అబుదాబి రవాణా అథారిటీ మంగళవారం ప్రకటించింది. ఇంటిగ్రేటెడ్ ట్రాన్స్‌పోర్ట్ సెంటర్ (ITC) ప్రకారం.. నగరం, సబర్బన్ ప్రాంతాలకు ప్రాథమిక బస్సు ఛార్జీ ఇప్పుడు కిలోమీటరుకు 5 ఫిల్స్‌తో పాటు 2 దిర్హామ్‌లుగా ఉంటుంది.  ఒక ప్రయాణీకుడు తన చివరి గమ్యాన్ని చేరుకోవడానికి ఒకటి కంటే ఎక్కువ బస్సులను మారాల్సి వస్తే.. నగరం నుండి శివారు ప్రాంతాలకు ఇకపై Dh2 బేస్ ఛార్జీని అనేకసార్లు చెల్లించాల్సిన అవసరం లేదని అథారిటీ వివరించింది. ట్రిప్ ముగింపులో 'హఫాలట్' స్మార్ట్ కార్డ్ ద్వారా చెల్లించబడుతుంది. ప్రయాణీకుల బోర్డింగ్ గమ్యస్థానం నుండి అతని/ఆమె చివరి డ్రాప్‌ఆఫ్ వరకు టిక్కెట్ ధర లెక్కించబడుతుందని ITC తెలిపింది. అయితే, ప్రయాణీకుడు సహేతుకమైన వ్యవధిలో బస్సును మార్చాలి. మార్పుల సంఖ్య రెండు సార్లు మించకూడదు. అంటే గరిష్టంగా మూడు బస్సులను ఉపయోగించి ప్రయాణాన్ని పూర్తి చేయాలి. ప్రయాణం ఒకే దిశలో ఉండాలి. ప్రయాణానికి అయ్యే ఖర్చును లెక్కించేందుకు ప్రయాణికులు బస్సు ఎక్కేటప్పుడు,  దిగే ముందు తమ కార్డులను స్వైప్ చేయాల్సి ఉంటుంది. ట్రిప్ ముగింపులో వారి కార్డ్‌లను స్వైప్ చేయడంలో విఫలమైన వారికి గరిష్ట రుసుము వసూలు చేయబడుతుందని ప్రకటించింది.