స్టైల్‌ అంటే రజనీకాంత్‌.. రజనీకాంత్‌ అంటే స్టైల్‌. 'కబాలి రా..' అంటూ టీజర్‌తోనే రికార్డుల మోత మోగించేశారు సూపర్‌స్టార్‌. అయితే ఇప్పుడు ఆయన అభిమానులకు ఓ చేదు వార్త. పా రంజిత్‌ దర్శకత్వం వహించిన 'కబాలి' చిత్ర ఆడియో విడుదల కార్యక్రమాన్ని రద్దు చేసినట్లు చిత్ర బృందం వెల్లడించింది. పాటలను నేరుగా మార్కెట్లోకి విడుదల చేయనున్నట్లు తెలిపింది. తొలుత అనుకున్న దాని ప్రకారం జూన్‌ 12న 'కబాలి' ఆడియో వేడుక జరగాల్సి ఉంది. అయితే రజనీకాంత్‌ ప్రస్తుతం అమెరికాలో ఉన్నారు. వేడుక ఖరారు చేసిన తేదీ నాటికి ఆయన అందుబాటులో ఉండకపోవచ్చు.
దీంతో నేరుగా ఆడియోను మార్కెట్లోకి విడుదల చేయాలని నిర్ణయించినట్లు చిత్ర బృందం పేర్కొంది. దీంతో ఆయన అభిమానులు డీలా పడిపోయారు. తమ అభిమాన కథానాయకుడిని ఆడియో వేడుక సందర్భంగానైనా చూడవచ్చని ఆశపడిన వారికి నిరాశే మిగిలింది. సంతోష్‌ నారాయణ్‌ సంగీతం సమకూర్చిన ఈ చిత్రంలో రజనీ సరసన రాధిక ఆప్టే నటించారు. జులై 1న 'కబాలి'ని ప్రేక్షకుల ముందుకు తీసుకొచ్చేందుకు చిత్ర బృందం ఏర్పాట్లు చేస్తోంది.