పవిత్ర రమదాన్‌ మాసంలో తొలి రోజున కేవలం 5 గంటల్లోనే మొత్తం 250 ప్రమాదాలు చోటుచేసుకున్నాయని దుబాయ్‌ పోలీస్‌ వర్గాలు వెల్లడించాయి. కమాండ్‌ అండ్‌ కంట్రోల్‌ సెంటర్‌ ఆఫ్‌ దుబాయ్‌ పోలీస్‌, తొలి రోజు 2419 ఫోన్‌ కాల్స్‌ని అందుకుంది. 250 ప్రమాదాలకు సంబంధించిన సమాచారాన్ని కమాండ్‌ కంట్రోల్‌ సెంటర్‌కి తెలియజేశారు. డైరెక్టర్‌ లెఫ్టినెంట్‌ కల్నల్‌ కజ్రాజ్‌ మజీద్‌ అల్‌ కజ్రాజి ఈ విషయాల్ని వెల్లడించారు. ఇతర వాహనాలతో తగినంత దూరం రోడ్లపై పాటించాల్సిందిగా వాహనదారులకు విజ్ఞప్తి చేసిన కజ్రాజ్‌ మజీజ్‌, వేగ నియంత్రణపై శ్రద్ధ అవసరమని సూచించారు. అలాగే, చిన్న చిన్న విషయాల కోసం ఎమర్జన్సీ ఫోన్‌కాల్‌ డిపార్ట్‌మెంట్‌ని ఇబ్బంది పెట్టవద్దనీ, తద్వారా ఎమర్జన్సీ సర్వీసులకు ఆటంకం కలుగుతుందన్నారు. రస్‌ అల్‌ ఖైమాలో ఓ మహిళ రోడ్డు దాటుతుండగా, ప్రమాదానికి గురై చనిపోయిందని పోలీసులు తెలిపారు. రోడ్లు దాటేటప్పుడు పాదచారులు అప్రమత్తంగా ఉండాలని వారు కోరారు.