యూఏఈ: అబుదాబి బయలుదేరిన ఎతిహాద్ విమానం పక్షులను ఢీకొట్టిన అనంతరం కొలంబోకు తిరిగి వచ్చింది. సెప్టెంబర్ 3న కొలంబో బండారునాయకే అంతర్జాతీయ విమానాశ్రయం (CMB) నుండి అబుదాబి జాయెద్ అంతర్జాతీయ విమానాశ్రయం (AUH)కి వెళ్లాల్సిన EY395 టేకాఫ్ అయిన కొద్దిసేపటికే తిరిగి వచ్చిందని అధికారులు తెలిపారు. జరిగిన అసౌకర్యానికి విమానయాన సంస్థ క్షమాపణలు చెప్పింది.  పక్షులను ఢీకొట్టడం ప్రమాదకరమని, తనిఖీల తర్వాత తిరిగి కార్యకలాపాలను ప్రారంభిస్తామని విమానయాన సంస్థ తెలిపింది.తనిఖీల అనంతరం ఎతిహాద్ విమానం కొలంబో నుండి బయలుదేరిందని వెల్లడించారు. 4 గంటల 55 నిమిషాల ఆలస్యంతో మంగళవారం మధ్యాహ్నం 12.40 గంటలకు అబుదాబికి విమానం చేరుకుందని, వాస్తవానికి ఈవై395 విమానం మంగళవారం ఉదయం 7.45 గంటలకు అబుదాబి రావాల్సి ఉందని పేర్కొన్నారు. ఏవైనా సందేహాలుంటే స్థానిక ఫోన్ నంబర్లు, లైవ్ చాట్ మరియు సోషల్ మీడియా ద్వారా తమను సంప్రదించాలని ఎతిహాద్ ఎయిర్‌వేస్ ప్రయాణికులకు సూచించింది.