మహారాష్ట్ర ప్రభుత్వం పూణె ఎయిర్‌పోర్ట్ పేరు మార్పు నిర్ణయం తీసుకుంది. ఈ విమానాశ్రయాన్ని "జగద్గురు సంత్ తుకారాం మహరాజ్ అంతర్జాతీయ విమానాశ్రయం"గా పునర్నామకరణం చేశారు. ఈ నిర్ణయం ముఖ్యమంత్రి ఏక్‌నాథ్ షిండే అధ్యక్షతన జరిగిన కేబినెట్ సమావేశంలో తీసుకున్నారు.

పూర్వం ఈ విమానాశ్రయాన్ని లోహ్‌గావ్ విమానాశ్రయం అని పిలిచేవారు. పూణెలోని ఈ విమానాశ్రయానికి సంత్ తుకారాం పేరు పెట్టాలని మురళీధర్ మోహోల్ సూచించారు. ప్రస్తుతం మురళీధర్ మోహోల్ పూణె నుంచి ఎంపీగా ఉన్నారు. ఈ ప్రతిపాదనను మహారాష్ట్ర ఉప ముఖ్యమంత్రి దేవేంద్ర ఫడ్నవీస్ కూడా మద్దతు ఇచ్చారు. ఫడ్నవీస్ మాట్లాడుతూ, ఈ పేరు మార్పు ప్రతిపాదనను కేంద్ర ప్రభుత్వానికి పంపుతామని తెలిపారు. కేంద్ర మంత్రి నితిన్ గడ్కరీ కూడా ఈ ప్రతిపాదనను ప్రశంసించారు. 

ఈ నిర్ణయం మహారాష్ట్రలో అసెంబ్లీ ఎన్నికలకు ముందు తీసుకోవడం గమనార్హం. ఈ మార్పు ద్వారా పూణె విమానాశ్రయానికి సంత్ తుకారాం మహరాజ్ పేరు పెట్టడం ద్వారా మహారాష్ట్ర ప్రభుత్వం సాంస్కృతిక వారసత్వాన్ని గౌరవించాలనే ఉద్దేశ్యంతో ఈ నిర్ణయం తీసుకుంది. ఈ మార్పు పుణె నగరానికి కొత్త గుర్తింపు తెస్తుందని, స్థానిక ప్రజలలో గర్వభావాన్ని పెంపొందిస్తుందని ఆశిస్తున్నారు.

--వేణు పెరుమాళ్ల(మాగల్ఫ్ ప్రతినిధి)