హైదరాబాద్ నగరం పాతబస్తీలోని ఉమ్మడి దేవాలయాల ఊరేగింపు కమిటీ బోనాల షెడ్యూల్ ను విడుదల చేసింది. కమిటీ సభ్యులు ఈ యేడాది ఆషాఢమాస బోనాల ఉత్సవాలను 22 ఆలయాల్లో ఘనంగా నిర్వహించడానికి చర్యలు తీసుకుంటున్నారు. కమిటీ ఆధ్వర్యంలో అమ్మవారికి నిర్వహించే కైంకర్యాలను నిర్వాహకులు తెలియజేశారు.ఇందులో భాగంగా జూలై 22న ఉదయం కలశస్థాపన, ధ్వజారోహణంతో ఉత్సవాలకు అంకురార్పణ జరుగుతుందన్నారు. 23న సహస్ర అక్షితార్చన, 24న ఘట స్థాపన, 25న లక్ష భిల్వార్చన, 26న పలు కార్యక్రమాలతో పాటు 27న దీపోత్సవం, తీపి వంటకాలతో అమ్మవారికి ఛప్పన్ భోగ్ నిర్వహిస్తారు. 28న లక్ష పుష్పార్చన, 29న లక్ష కుంకుమార్చన, 30న చండీహవనంతోపాటు తొట్టెల స్వాగతం, అర్ధరాత్రి పొట్టేళ్లతో ఆహార ఊరేగింపు నిర్వహించి బలిగంప పూర్తిచేస్తారు.

31న ఉదయం అమ్మవారికి మహాభిషేకాన్ని నిర్వహించి అనంతరం భక్తుల బోనాల సమర్పణకు అనుమతిస్తారు. సాయంత్రం శాంతి కల్యాణం నిర్వహిస్తారు. ఆగస్ట్ 1న పోతరాజుల స్వాగతం నిర్వహించిన అనంతరం రంగం, అమ్మవారి తొట్టెల ఊరేగింపు కార్యక్రమం ఉంటుంది. 2న దేవాలయాల్లో అష్టదళ పాదపద్మార్చనతో ఉత్సవాలు ముగుస్తాయి. అటుపైన వచ్చే ఆదివారం రోజున మారు బోనం ఉంటుంది.