యూఏఈ: ఎతిహాద్ రైల్ రాకతో ఆస్తుల విలువ 15 శాతం వరకు పెరగవచ్చని రియల్ ఎస్టేట్ నిపుణులు తెలిపారు. ఏది ఏమైనప్పటికీ, ప్రాజెక్ట్ పురోగతిలో ఉన్నందున ప్రభావం క్రమంగా కనిపిస్తుందని తెలిపారు. "ఎతిహాద్ రైల్ స్టేషన్ల చుట్టుపక్కల ప్రాంతాలలో అద్దెలు 10 నుండి 15 శాతం వరకు పెరిగే అవకాశం ఉంది. మెట్రో, ఎతిహాద్ రైల్ స్టేషన్‌లకు ప్రాపర్టీల సామీప్యత వాటి విలువను నిర్ణయించడంలో కీలక పాత్ర పోషిస్తుంది." అని మానిఫెస్ట్ రియల్ ఎస్టేట్ సీఈఓ జెఫ్ రాజు అన్నారు. మెట్రోపాలిటన్ ప్రీమియం ప్రాపర్టీస్‌లో సెకండరీ సేల్స్ హెడ్ స్వెత్లానా వాసిలీవా మాట్లాడుతూ.. అల్ జడాఫ్ వంటి నిర్దిష్ట ప్రాంతాలలో 5 నుండి 7 శాతం వరకు ధరలు పెరిగే అవకాశం ఉందని తెలిపారు. ఎతిహాద్ రైల్ ప్రారంభించిన తర్వాత స్టేషన్‌కు దగ్గరగా ఉన్న పెద్ద అపార్ట్‌మెంట్ లేఅవుట్‌లతో కూడిన ప్రాజెక్ట్‌లు 10 శాతం వరకు పెరగవచ్చని అన్నారు. అయితే, ఆస్తి విలువ పెరగడానికి కొంత సమయం పట్టవచ్చని కొందరు నిపుణులు అభిప్రాయపడ్డారు. మెట్రోపాలిటన్ క్యాపిటల్ రియల్ ఎస్టేట్ సీఈఓ రాట్సకెవిచ్ మాట్లాడుతూ.. ఆస్తి ధరపై తక్షణ ప్రభావం "పరిమితం" అయినప్పటికీ, దీర్ఘకాలిక ప్రభావాలు నెమ్మదిగా కనిపిస్తాయని పేర్కొన్నారు.  

ఎతిహాద్ రైల్ నెట్‌వర్క్ జనవరి 23న దాని మొదటి హై-స్పీడ్, ఆల్-ఎలక్ట్రిక్ ప్యాసింజర్ రైలును ఆవిష్కరించింది. ఇది దుబాయ్ - అబుదాబిల మధ్య కేవలం 30 నిమిషాల్లో ప్రయాణించవచ్చు. 350 kmph వేగంతో ఈ రైలు ఆరు స్టేషన్ల గుండా వెళుతుంది. వీటిలో నాలుగు అబుదాబి: రీమ్ ఐలాండ్, సాదియత్, యాస్ ఐలాండ్, జాయెద్ అంతర్జాతీయ విమానాశ్రయం. దుబాయ్‌లో స్టేషన్లు అల్ మక్తూమ్ అంతర్జాతీయ విమానాశ్రయం, అల్ జద్దాఫ్ ప్రాంతానికి సమీపంలో ఉంటాయి. అంతకుముందు, ఫుజైరా సకంకం ప్రాంతం, షార్జా యూనివర్సిటీ సిటీలో కూడా రెండు స్టేషన్లను ప్రకటించారు.