యూఏఈ: యూఏఈ నివాసితులు ఇస్లామిక్ పండుగ ఈద్ అల్ ఫితర్ జరుపుకోవడానికి ఐదు రోజుల వరకు సెలవును పొందుతారు. చంద్రుడు ఎప్పుడు కనిపిస్తాడనే దానిపై ఆధారపడి, వారాంతంతో సహా నాలుగు లేదా ఐదు రోజులు బ్రేక్ ఉంటుంది. ఈద్ తేదీ ఖగోళ శాస్త్ర లెక్కల ప్రకారం, ఐదు రోజుల సెలవు ఉండే అవకాశం ఉంది.  

ఈద్ అల్ ఫితర్ రమదాన్ తర్వాత వచ్చే ఇస్లామిక్ క్యాలెండర్ నెల అయిన షవ్వాల్ మొదటి తేదీన జరుపుకుంటారు. ఈ పండుగ ఉపవాస నెల ముగింపును సూచిస్తుంది. ఇస్లామిక్ హిజ్రీ నెలలు 29 లేదా 30 రోజులు ఉంటాయి, ఇది చంద్రవంక ఎప్పుడు కనిపిస్తుందనే దానిపై ఆధారపడి ఉంటుంది.

యూఏఈ చంద్ర వీక్షణ కమిటీ రమదాన్ 29 (శనివారం, మార్చి 29) నాడు ఆకాశంలో చంద్రవంక కోసం సమావేశమవుతుంది. గుర్తించబడితే, పవిత్ర మాసం 29 రోజులతో ముగుస్తుంది.  ఈద్ విరామం మార్చి 30 (ఆదివారం) నుండి ఏప్రిల్ 1 (మంగళవారం) వరకు ఉంటుంది. సెలవుదినానికి ముందు వచ్చే శనివారం వారాంతంతో కలిపితే, అది నాలుగు రోజుల బ్రేక్ అవుతుంది. ఒకవేళ మార్చి 29న చంద్రుడు కనిపించకపోతే, పవిత్ర రమాన్ నెల 30 రోజులు ఉంటుంది. ఈ సంవత్సరం, ఈద్ కోసం మూడు రోజులతో పాటు రమదాన్ 30వ తేదీని కూడా సెలవు దినంగా ప్రకటించారు. అంటే మార్చి 30 (ఆదివారం) (రమదాన్ 30) నుండి ఏప్రిల్ 2 (బుధవారం) వరకు బ్రేక్ ఉంటుంది. సెలవుదినానికి ముందు వచ్చే శనివారం వారాంతంతో కలిపితే, అది ఐదు రోజుల బ్రేక్ అవుతొంది.