రియాద్: రియాద్‌లోని కింగ్ ఖలీద్ అంతర్జాతీయ విమానాశ్రయం అంతర్జాతీయ విమానాశ్రయాల మొదటి వర్గంలో చేరింది. ఏటా 15 మిలియన్లకు పైగా ప్రయాణీకులను నిర్వహించడంలో అగ్రగామిగా నిలిచింది. ఈ మేరకు జనరల్ అథారిటీ ఆఫ్ సివిల్ ఏవియేషన్ (GACA) విడుదల చేసిన విమానాశ్రయం, జాతీయ క్యారియర్ విమాన షెడ్యూల్‌లకు అనుగుణంగా ఏప్రిల్ 2025 నివేదిక వెల్లడించింది.  రియాద్ విమానాశ్రయం 90 శాతం సమ్మతి రేటును నమోదు చేసింది. దమ్మామ్‌లోని కింగ్ ఫహద్ అంతర్జాతీయ విమానాశ్రయం, అభా అంతర్జాతీయ విమానాశ్రయం, NEOM అంతర్జాతీయ విమానాశ్రయం, తురైఫ్ విమానాశ్రయం, వాడి అల్-దవాసిర్ విమానాశ్రయం కూడా ఐదు విభాగాలలో అత్యుత్తమ ర్యాంకులను కైవసం చేసుకున్నాయి.

ఈ నివేదిక, విమానాలు షెడ్యూల్ చేసిన సమయానికి 15 నిమిషాలలోపు బయలుదేరే లేదా చేరుకునే విమానాల ఆధారంగా పనితీరు ఆధారంగా అంచనా వేస్తుంది. విమానయాన సంస్థలు, విమానాశ్రయాలు షెడ్యూల్‌లకు ఎంత బాగా కట్టుబడి ఉన్నాయో ప్రయాణికుల నుంచి అభిప్రాయాన్ని సేకరించడంతోపాటు సేవా నాణ్యత, మొత్తం ప్రయాణ అనుభవాన్ని మెరుగుపరచడానికి చేసే ప్రయత్నాలను పరిగణనలోకి తీసుకుని ర్యాంకులను కేటాయిస్తారు. 

అంతర్జాతీయ విమానాశ్రయాలలో రెండవ వర్గంలో దమ్మామ్‌లోని కింగ్ ఫహద్ అంతర్జాతీయ విమానాశ్రయం 87 శాతంతో అగ్రస్థానంలో నిలిచింది. అంతర్జాతీయ విమానాశ్రయాలలో ఏటా 2 మిలియన్ల నుండి 5 మిలియన్ల మంది ప్రయాణికులను నిర్వహించే మూడవ వర్గంలో అభా అంతర్జాతీయ విమానాశ్రయం 91 శాతం సమ్మతి రేటుతో మొదటి స్థానంలో నిలిచింది. NEOM అంతర్జాతీయ విమానాశ్రయం నాల్గవ విభాగంలో ముందుంది. ఏటా 2 మిలియన్ల కంటే తక్కువ మంది ప్రయాణికులను కలిగి ఉన్న అంతర్జాతీయ విమానాశ్రయాలలో 95 శాతం సమ్మతి సాధించాయి. దేశీయ విమానాశ్రయాలలో ఐదవ వర్గంలో తురైఫ్ విమానాశ్రయం, వాడి అల్-దవాసిర్ విమానాశ్రయాలు 100 శాతం సమ్మతి రేటుతో మొదటి స్థానంలో ఉన్నాయి.

విమానయాన స్థాయిలో సౌదియా 89 శాతం ఆన్-టైమ్ రాక రేటు, 89 శాతం ఆన్-టైమ్ డిపార్చర్ రేటును సాధించింది. ఫ్లైనాస్ రాకపోకలకు 86 శాతం, డిపార్చర్ కు 91 శాతం నమోదు చేయగా.. ఫ్లైడీల్ రాకపోకలకు 87 శాతం డిపార్చర్ లకు 91 శాతం నమోదు చేసింది. అత్యుత్తమ పనితీరు కనబరిచిన దేశీయ, అంతర్జాతీయ మార్గాలను హైలైట్ చేస్తూ.. రియాద్-అభా మార్గం దేశీయ విమానాలలో 96 శాతం ఆన్-టైమ్ పనితీరును సాధించిందని, రియాద్-అమ్మన్ మార్గం 97 శాతం సమ్మతి రేటుతో అంతర్జాతీయంగా మొదటి స్థానంలో నిలిచిందని నివేదిక వెల్లడించింది.