దోహా, ఖతార్: ప్రైవేట్ హెల్త్‌కేర్ రంగంలో పనిచేస్తున్న ఒక ఆరోగ్య కేంద్రాన్ని తాత్కాలికంగా మూసివేసినట్లు ప్రజారోగ్య మంత్రిత్వ శాఖ ప్రకటించింది. మంత్రిత్వ శాఖ తనిఖీల అనంతరం ఈ నిర్ణయం తీసుకున్నట్లు తెలిపారు. ఈ కేంద్రంలో నిబంధనలకు సరపడా వైద్య నిపుణులు లేరని నిర్ధారణ కావడంతో మూసివేయాలని నిపుణులు సూచించారు. మంత్రిత్వ శాఖ నిర్దేశించిన నిబంధనలు, ప్రమాణాలను ఉల్లంఘించిందని వెల్లడించింది.

దేశంలోని అన్ని ఆరోగ్య సంరక్షణ సౌకర్యాలు.. ఆరోగ్య సంరక్షణ నియంత్రణ చట్టాలు, నిబంధనలను పాటించాలని ప్రజారోగ్య మంత్రిత్వ శాఖ స్పష్టం చేసింది. రోగుల భద్రత, అందించే ఆరోగ్య సేవల నాణ్యతను నిర్ధారించడానికి ఏదైనా ఆరోగ్య సంబంధిత కార్యకలాపాలను నిర్వహించేటప్పుడు అన్ని చట్టబద్ధమైన నిబంధనలను పాటించాలని సూచించారు.