శింబు నటిస్తున్న కొత్త చిత్రం 'ఏఏఏ'లో అందాలతార శ్రేయ తల్లిగా నటిస్తుందంటూ వస్తున్న వార్తలను చిత్ర దర్శకుడు ఆదిక్‌ రవిచంద్రన్ ఖండించారు. ఈ వార్తలు ఎలా వచ్చాయో తెలియడం లేదని, తమ చిత్రంలో శ్రేయా హీరోకి తల్లిగా నటించడం లేదని స్పష్టం చేశారు. అంతేకాదు, ఆమె పాత్ర ఈ చిత్రంలో చాలా కీలకమైనదని, ఆమె కెరీర్‌కి మంచి బ్రేక్‌ ఇచ్చేలా ఉంటుందని దర్శకుడు పేర్కొన్నారు. ఈ చిత్రంలో శింబు త్రిపాత్రల్లో నటిస్తుండగా, ఒక పాత్రతో ప్రేమలో పడే పాత్రలోనే శ్రేయా నటిస్తోందని చెప్పారు. శింబు - శ్రేయల మధ్య వచ్చే సన్నివేశాలు ప్రేక్షకుల్ని అమితంగా ఆకట్టుకుంటాయని కూడా చెప్పారు. కాగా, 'ఏఏఏ' చిత్రం షూటింగ్‌ రెండ్రోజుల క్రితం పూజా కార్యక్రమంతో లాంఛనంగా ప్రారంభమైంది. యువన శంకర్‌రాజా సంగీతం అందిస్తున్నారు. దాదాపు ఐదేళ్ల తరువాత శింబు - యువన్ కాంబినేషనలో ఈ చిత్రం రూపొందుతోంది.