మనతో రక్త సంబంధం లేదు..బంధువు కాదు.ఇంట్లో వ్యక్తి కాదు..అవసరం వస్తే మాత్రం వెంటనే గుర్తొస్తాడు. ఏంటో చెప్పు నేనున్నానంటూ భుజంపై చేయి వేస్తాడు.ఎక్కడో పుడతాడు.. ఎక్కడో పెరుగుతాడు.. అసలు సంబంధమే లేని వ్యక్తి.. అయినా జీవితంలో ప్రతి చోట నీతోనే ఉంటాడు.. వాడే ఫ్రెండ్. స్నేహం..ఎక్కడ మెుదలవుతుందో తెలియదు.ఎందుకూ అనే ప్రశ్నే రాదు. కష్టమొస్తే.. కన్నీరు తుడుస్తాడు.సంతోషమొస్తే పంచుకుంటాడు. అమ్మా, నాన్న, అక్కా, చెల్లి, తమ్ముడు.. ఇలా అన్ని బంధాలను దేవుడే ఇచ్చినా..స్నేహితుడిని మాత్రం నువ్వే ఎంచుకోమని పంపిస్తాడు. 

ప్రపంచంలో మనల్ని ఎవరు నమ్మినా..నమ్మకున్నా.. మనం చేసే ప్రతి పనిలో వెంట వచ్చే వాడే మన దోస్త్. ముఖ్యంగా అబ్బాయిల విషయంలో ఇదే మరో టైప్​లో ఉంటుంది. మనతో పాటు నాన్న ఎవర్ని అయితే కామన్​గా కలిపి తిడతారో వాళ్లే మనకి అన్ని. ఇంట్లో చెప్పుకోలేని, చేయలేని చాలా విషయాలు, వేషాలు.. అన్ని వాడి దగ్గరే బహిర్గతం చేస్తాం. "ముందు వాడితో తిరగడం మానేయ్" అని నాన్న ఎంత గట్టిగా తిట్టినా వాడిని వదలం. "నీ వల్లే అంతా ఇలా అయిందిరా" అని మనం వాడిని తిట్టినా వాడు మనల్ని వదలడు. ఇలాంటి బంధాలకు విలువ ఇవ్వడం తప్ప వెల కట్టలేం.. అలాంటి గొప్ప స్నేహితులున్న మీరు ఎంత అదృష్టవంతులో.. మీ స్వచ్ఛమైన స్నేహాన్ని వారికి ఇచ్చి వాళ్లని మీకంటే అదృష్టవంతులుగా చేయండి. 

ఊహ తెలిసి స్కూల్​కి వెళ్లడం మొదలు పెట్టాక మీతో పాటు అడుగులేసిన వాళ్లు.. బలపం నుంచి బాక్స్ షేర్ చేసుకున్న జ్ఞాపకాలు.. ఇంట్లో వాళ్లు కొనిచ్చిన సైకిల్ మీద ఇద్దరు కలిసి వెళ్లిన సందర్భాలు.. ఇంటర్​లో కలిసి చేసిన అల్లరులు.. డిగ్రీకి వచ్చే సరికి మారిన ఆలోచనలు.. కాలం మారుతున్న కొద్ది పరిణితి చెందడంతో పాటు మైత్రిలో కూడా అనేక మార్పులు.. 'నిక్కర్ నుంచి జీన్స్‌లోకి మారినా.. సైకిల్ నుండి బైక్‌లోకి మారినా.. కాన్వెంట్ నుండి కాలేజ్‌కి మారినా.. నోట్ బుక్ నుండి ఫేస్ బుక్ మారినా... ఏరా పిలుపునుండి బాబాయ్ పిలుపు దాకా కాలింగ్ మారినా... ఫ్రెండ్ అన్న మాటలో స్పెల్లింగ్ మారునా.. ఫీలింగ్ మారునా!' అంటూ ట్యూన్​లో కట్టడం ఏమోగాని.. పరిస్థితుల్ని బట్టి మనల్ని గైడ్ చేసే వాడి గుడ్​నెస్​కు.. ఏం ఇచ్చి రుణం తీర్చుకుంటాం? 

మన లైఫ్​లో ఒక స్టేజ్ వచ్చే సరికి దోస్తుల మధ్య దూరం పెరుగుతుంది. చిన్నప్పటి నుంచి పెరిగిన ఇంటికే పండుగొస్తేనే, ఇంకేదైనా పనుంటేనో చుట్టం చూపుగా వెళ్లాల్సి వస్తుంది. మనం వచ్చాం అని తెలుసుకుని మన కోసం ఇంటికి వచ్చే ఫ్రెండ్​ను "ఏరా ఎలా ఉన్నావ్?" అని నువ్వు అడిగే లోపలే.. "ఏరా వాడు వస్తే తప్ప నీకు మా ఇల్లు గుర్తురాదా?" అని అడిగేస్తుంది అమ్మ. ఎప్పటిలాగే వాడిసైడ్ ఒక రేంజ్​లో లుక్ ​ఇచ్చే నాన్న. ఇవ్వన్నీ నవ్వుతూనే స్వీకరించేది వాడు ఒక్కడే. అయితే వాడిని తిడుతున్న నాన్న చెడ్డవారు కాదు. తిట్టుంచుకుంటున్న వాడు అంతకంటే చెడ్డవాడు కాదు.

బిడ్డ ఎక్కడ చెడిపోతాడో అనే భయం నాన్నదైతే.. జరిగిన తప్పులు ఎలా సరిదిద్దుకోవాలో ముందుగా సూచించే బాధ్యత నేస్తానిదే. ఎంత మంచి స్నేహమైనా దెబ్బతినడానికి చిన్న సందర్భం చాలు. అలాంటి పరిస్థితులు ఎదురైనప్పుడు వాడు మన మంచికోసమేగా చెప్పింది అనే విషయాన్ని గ్రహిస్తే.. దోస్త్ మేరా దోస్త్ అంటూ ట్యూన్ కట్టుకుంటూ ఖుషీగా ఉండొచ్చు. 

 సోషల్​ మీడియా వచ్చాక చాలా వరకు స్నేహితుల మధ్య దూరం తగ్గింది. నిత్యం వాటిలో ఛాటింగ్‌లు, వీడియో కాలింగ్‌లతో పలకరించుకుంటున్నారు. ప్రత్యక్షంగా కలుసుకోవడం మాత్రం చాలా వరకు తగ్గిపోయింది. ఫ్రెండ్‌షిప్‌ డే రోజు ఎలాగైనా కలిసి తీరాల్సిందే అని కుర్రాళ్ల నుంచి పెద్దల వరకు ఎవరి ఏర్పాట్లు వారు చేసుకున్నారు. పాఠశాలలో, కళాశాలలో కలిసి చదువుకున్న స్నేహితులు ఈ జాబితాలో అత్యధికంగా ఉన్నారు. చదువులు పూర్తయ్యాక ఒక్కొక్కరూ ఒక్కో గమ్యాన్ని ఎంచుకుని దూరమైన కారణంగా ఇలాంటి సందర్భాలు వచ్చినప్పుడైనా అందరూ ఒకచోట కలుసుకుని దగ్గరవ్వాలనే ప్రయత్నంలో ఉన్నారు. ఈ సందర్భాన్ని పురస్కరించుకుని స్నేహితుల దినోత్సవాన్ని జరుపుకోవడం ఆనవాయితీగా వస్తోంది. 

ఈ తరం కుర్రకారు ప్రత్యేకించి జెన్‌ జెడ్‌ తరంలో 80 శాతం మంది ఒంటరితనంతో బాధ పడుతున్నారని అధ్యయనాలు చెబుతున్నాయి. బేబీ బూమర్స్‌లో 45 శాతంతో పోలిస్తే ఇది చాలా ఎక్కువ. అత్యంత ఒంటరిగా, మానసికంగా ఇబ్బంది పడుతున్నారు. ఇటీవల టీనేజర్లలో ఆత్మహత్యలకు ఈ ఒంటరితనం కూడా కారణమే. చిన్న కారణాలకే బలవన్మరణానికి పాల్పడుతున్నారు. స్నేహితులు లేకపోవడమే జెన్‌ జెడ్‌ సమస్య. స్నేహితుడు తోడుంటే కష్టమైన సమయాల్లో తోడుగా ఉంటాడని, ధైర్యం చెబుతాడని మనస్తత్వ నిపుణులు చెబుతున్నారు. 

--డి.వి.అరవింద్ (మా గల్ఫ్ ప్రతినిధి)