గోదావరి తీర ప్రాంత ప్రజలు, పర్యాటకులు ఎంతో ఆసక్తిగా ఎదురుచూసిన పాపికొండల విహార యాత్ర మళ్లీ ప్రారంభమైంది. వరదల కారణంగా గత మూడు నెలలుగా నిలిచిపోయిన ఈ యాత్రకు ఇప్పుడు అధికారిక అనుమతి లభించింది. అల్లూరి సీతారామరాజు జిల్లా దేవీపట్నం మండలంలోని గండిపోశమ్మ అమ్మవారి ఆలయం నుంచి ఈ రోజు ఉదయం విహారయాత్ర పునఃప్రారంభమైంది. గోదావరి వరదలు తగ్గడంతో పాటు, వాతావరణ పరిస్థితులు అనుకూలించడంతో టూరిజం శాఖ ఉన్నతాధికారులు యాత్ర పునఃప్రారంభానికి గ్రీన్ సిగ్నల్ ఇచ్చారు. పాపికొండల అందాలను ఆస్వాదించేందుకు రాష్ట్రం నలుమూలల నుంచి పర్యాటకులు భారీగా తరలి వస్తున్నారు.

పాపికొండలు గోదావరి నది ఒడ్డున ఉన్న ప్రకృతి సౌందర్యానికి ప్రతీకగా పేరుగాంచాయి. నది వంకరల వెంట కొండల మధ్యుగా సాగే బోటు ప్రయాణం పర్యాటకులకు అపూర్వమైన అనుభూతిని అందిస్తుంది. అయితే, గోదావరి వరదలు పెరగడంతో జూలైలో ఈ యాత్రను తాత్కాలికంగా నిలిపివేశారు. వరదల ప్రభావం తగ్గి, నీటి మట్టం సాధారణ స్థాయికి చేరడంతో అధికారులు మళ్లీ యాత్రను ప్రారంభించారు. పర్యాటకుల భద్రత కోసం అన్ని జాగ్రత్తలు తీసుకున్నామని, బోటు సర్వీసులు పూర్తిగా సాంకేతిక తనిఖీల తర్వాతనే అనుమతించామని టూరిజం శాఖ అధికారులు తెలిపారు.

ప్రస్తుతం మొత్తం 15 బోట్లు సేవలందించేందుకు సిద్ధంగా ఉన్నట్లు అధికారులు వెల్లడించారు. ప్రతి బోటులో భద్రతా సిబ్బంది, లైఫ్ జాకెట్లు, మరియు అత్యవసర సదుపాయాలు అందుబాటులో ఉంచినట్లు తెలిపారు. పాపికొండల విహారయాత్ర పునఃప్రారంభం పర్యాటక రంగానికి ఊపునిస్తుందని, స్థానిక ఆర్థిక వ్యవస్థకు కూడా ఇది మళ్లీ చైతన్యం తెచ్చిపెడుతుందని భావిస్తున్నారు. గోదావరి తీర ప్రాంత ప్రజలు ఈ యాత్ర పునఃప్రారంభాన్ని పండుగలా జరుపుకుంటున్నారు. రాష్ట్ర టూరిజం శాఖ ఈ సీజన్‌లో పెద్ద సంఖ్యలో దేశీయ, విదేశీ పర్యాటకులను ఆకర్షించేందుకు ప్రత్యేక ప్రచార కార్యక్రమాలను చేపట్టనుంది.