వృక్షో రక్షితి రక్షితః ఈ మాట అక్షరాలా తెలంగాణలో అమలు అవుతుందే చెప్పాలి. గత పది హేను రోజులు తెలంగాణ లో హరిత హారం పేరిట వేల చెట్లు నాటారు..నాటుతున్నారు. ఈ కార్యక్రమంలో స్కూల్ విద్యార్థుల నుంచి తెలంగాణ సీఎం వరకు పాల్గొన్నారు. ఇక సినీ సెలబ్రెటీలు చిరంజీవి, నాగార్జున, అమల, నవతరం నటులు అంతా పాల్గొని ప్రజలను ఉత్సాహ పరుస్తున్నారు. పవిత్రమైన పర్యావరణాన్ని కాపాడాలనే ఉద్దేశం తో , తెలంగాణా ప్రభుత్వం చేపట్టిన హరితహారం కార్యక్రమం లో హీరో నాని మరియు "మజ్ను" చిత్ర బృందం పాల్గొన్నారు. ఈ కార్యక్రమం కోసం సేకరించిన వివిధ రకాల మొక్కలను చిత్ర బృందం ఈ రోజు నాటటం జరిగింది.

ఈ సందర్భం గా హీరో నాని మాట్లాడుతూ, " హరితహారం అనేది చాలా మంచి ఐడియా. పర్యావరణాన్ని కాపాడాలని అందరూ అంటారు కానీ ఎవ్వరు పెద్దగా ఏమీ చేయరు. అందుకు భిన్నం గా CM గారు అవేర్నెస్ పెంచే ఈ కార్యక్రమానికి పిలుపునివ్వడం నిజం గా చాలా మంచి విషయం. అందుకే తెలుగు చిత్ర పరిశ్రమ ఈ కార్యక్రమం లో ఉత్సాహం గా పాల్గొంటోంది.
ఎవరి ఇళ్లల్లో వాళ్ళు నాటటం కాకుండా, మా మజ్ను చిత్ర బృందం మొత్తం కలిసి ఈ కార్యక్రమం లో పాల్గొనాలని నిర్ణయించుకుని, ఇలా చేస్తున్నాం. ఎవరికి తోచిన విధం గా వారు, ఒక చిన్న చోటు ఉన్నా కూడా ఒక మొక్కను పెంచితే, ఖచ్చితం గా మంచి మార్పు ఉంటుంది అని అనుకుంటున్నాను", అని అన్నారు.