రియాద్: సౌదీలోని పలు ప్రాంతాలలో ఉరుములతో కూడిన వర్షాలు కురుస్తాయని, ఇవి డిసెంబర్ 6 నుండి డిసెంబర్ 11 వరకు కొనసాగుతాయని నేషనల్ సెంటర్ ఫర్ మెటియరాలజీ (NCM) వెల్లడించింది. అసిర్, అల్-బహా, మక్కా, మదీనా, తబుక్, హైల్, ఖాసిమ్, జాజాన్, అల్-జౌఫ్, ఉత్తర సరిహద్దులు, రియాద్ మరియు తూర్పు ప్రావిన్స్ ప్రాంతాలలో ఉరుములతో కూడిన వర్షాలు కురిసే అవకాశం ఉందని పేర్కొంది.

అదే సమయంలో దుమ్ము తుఫానులకు కారణమయ్యే చురుకైన డౌన్‌డ్రాఫ్ట్‌లు, కొన్ని ప్రాంతాలలో వడగళ్ళు, ఎర్ర సముద్రం మరియు అరేబియా గల్ఫ్‌లో అధిక అలల తీవ్రత ఉంటుందని తెలిపింది.  భారీ వర్షపాతం కారణంగా లోయలు మరియు లోతట్టు ప్రాంతాలలో ఆకస్మిక వరదలు సంభవించే ప్రమాదం ఉందని హెచ్చరించింది.

వాతావరణ అప్డేట్ లను నిరంతరం చెక్ చేసుకోవాలని, ప్రయాణం సమయంలో జాగ్రత్తగా ఉండాలని సూచించింది.  వాతావరణ కేంద్రం వెబ్‌సైట్, సోషల్ మీడియా ఛానెల్‌లు మరియు అన్వా యాప్ నుండి అధికారిక సమాచారాన్ని మాత్రమే ఫాలో కావాలని కోరింది.