మస్కట్: మంగళవారం ఉదయం ముత్రా తీరంలో ఒక టూరిస్ట్ బోట్ బోల్తా పడిన సంఘటనలో ఓడలోని పర్యాటకులు ఎవరూ లైఫ్ జాకెట్లు ధరించలేదని అధికారులు తెలిపారు. ఈ సంఘటనలో ముగ్గురు ఫ్రెంచ్ పౌరులు ప్రాణాలు కోల్పోగా, మరో ఇద్దరు స్వల్పంగా గాయపడ్డారని సివిల్ డిఫెన్స్ అండ్ అంబులెన్స్ అథారిటీ మరియు రాయల్ ఒమన్ పోలీసులు తెలిపారు. ఉదయం 9:40 గంటలకు సమాచారం అందిన వెంటనే మస్కట్ గవర్నరేట్‌లోని రెస్క్యూ టీమ్స్ వెళ్లాయని సివిల్ డిఫెన్స్ అధికార ప్రతినిధి కెప్టెన్ అలీ బిన్ సయీద్ అల్ ఫార్సీ వెల్లడించారు.  ముగ్గురు పర్యాటకులు సంఘటనా స్థలంలోనే మరణించారని, మరో ఇద్దరు స్వల్ప గాయాలతో బయటపడ్డారని, అంబులెన్స్ సిబ్బంది వారికి అక్కడికక్కడే చికిత్స అందించారని ఆయన తెలిపారు. రాయల్ ఒమన్ పోలీసులు విడుదల చేసిన ఒక ప్రకటన ప్రకారం, ముత్రాలోని సుల్తాన్ కబూస్ పోర్ట్ నుండి దాదాపు 2.5 నాటికల్ మైళ్ల దూరంలో పడవ బోల్తా పడింది. ప్రమాదం సమయంలో నౌకలో 25 మంది ఫ్రెంచ్ పర్యాటకులు, ఒక టూర్ గైడ్ మరియు పడవ కెప్టెన్ ఉన్నారు.