కువైట్: కువైట్ జాతీయ ఆర్థిక వ్యవస్థలో వేగంగా అభివృద్ధి చెందుతున్న రంగాలలో ఒకటైన ఎలక్ట్రానిక్ ప్లాట్‌ఫామ్‌ల ద్వారా నిర్వహించే రెస్టారెంట్, రెడీమేడ్ ఫుడ్ డెలివరీ సేవలను నియంత్రిస్తూ వాణిజ్య మరియు పరిశ్రమల మంత్రిత్వ శాఖ ఒక ఉత్తర్వును జారీ చేసింది. మార్కెట్ స్థిరత్వాన్ని పునరుద్ధరించడంతోపాటు చిన్న మరియు మధ్యతరహా సంస్థలను రక్షించే లక్ష్యంగా మూడు సంవత్సరాల పాటు రెస్టారెంట్లు, ఫుడ్ అవుట్‌లెట్‌లకు ప్లాట్‌ఫామ్ ఫీజులు మరియు కమిషన్‌లను వాణిజ్య మంత్రిత్వ శాఖ నిర్ణయిస్తుంది.

ప్లాట్‌ఫామ్‌లు వారి 2026 ఫీజులను నిర్ణయించి, ఫ్రేమ్‌వర్క్ జారీ చేసిన ఒక నెలలోపు మంత్రిత్వ శాఖకు సమర్పించాలి. సర్వీస్ ప్రొవైడర్లు మంత్రిత్వ శాఖ ఆమోదించిన ఒకే వార్షిక సేవా నిబంధనను కలిగి ఉండాలి. ఫీజులు, కమీషన్లు, గరిష్ట పరిమితులు మరియు గణన విధానాలను వివరించాలి. ఈ నిబంధన వెలుపల ఫీజులు వసూలు చేయడం లేదా డిస్కౌంట్లను అందించడంపై నిషేధం విధించారు.   

డెలివరీ ప్లాట్‌ఫారమ్‌లను నిర్వహిస్తున్న అన్ని లైసెన్స్ పొందిన కంపెనీలు నియంత్రణ అమలులోకి వచ్చిన తేదీ నుండి రెండు నెలల్లోపు అంతర్జాతీయ వర్గీకరణ సంఖ్య (532013) ప్రకారం "ఎలక్ట్రానిక్ ప్లాట్‌ఫారమ్‌ల ద్వారా డెలివరీ సేవలను నిర్వహించడం" కోసం వారి లైసెన్స్ కార్యకలాపాలను సవరించాలని సూచించారు. విస్తృతమైన పర్యవేక్షణ మరియు ఆర్థిక అధ్యయనాలను అనుసరించి ఈ నిర్ణయం తీసుకున్నట్లు మంత్రిత్వ శాఖ తెలిపింది.