సబ్‌ సానిక్‌ ప్రొపల్షన్‌ ట్యూబ్‌ అనే కొత్త టెక్నాలజీ ద్వారా ప్రయాణీకుల్ని గంటకు 1,200 కిలోమీటర్ల వేగంతో గమ్యస్థానాలకు చేర్చే రవాణా సౌకర్యాన్ని అందుబాటులోకి తెచ్చేందుకు దుబాయ్‌ ప్రయత్నాల్ని ప్రారంభించింది. ప్రపంచ వ్యాప్తంగా ఉన్న వందకు పైగా ప్రముఖ ఇంజనీరింగ్‌ సంస్థలు, వచ్చే నెలలో 40 గంటలపాటు నిర్వహించే క్యాక్రమంలో ఈ ప్రాజెక్టు కోసం పోటీ పడి తమ డిజైన్లను, తమ ఆలోచనల్ని అందించనున్నాయి. హైపర్‌ లూప్‌ అని పిలవబడ్తున్న ఈ కొత్త రవాణా మార్గాన్ని దుబాయ్‌ నుంచి ఫుజారియా మధ్య 127 కిలోమీటర్ల దూరంలో ఏర్పాటు చేయాలనుకుంటున్నారు. ఈ దూరాన్ని కేవలం 10 నిమిషాల్లో హైపర్‌లూప్‌తో చేరుకునే అవకాశాలున్నాయి. తక్కువ ఒత్తిడితో నిండి ఉండే ఓ ట్యూబ్‌ ఈ రవాణా మార్గంలో అత్యంత కీలకం. హైపర్‌ లూప్‌ డిజైన్‌ని తొలిసారిగా 2010లో తెరపైకి తీసుకొచ్చింది ఎలాన్‌ రీవ్‌ మస్క్‌. వచ్చే నెలలో జరిగే కాంపిటీషన్‌ కోసం ఏర్పాట్లు శరవేగంగా జరుగుతున్నాయి. ఈ కాంపిటీషన్‌, దుబాయ్‌ని కొత్త ప్రపంచంలోకి తీసుకెళుతుందని అంచనా వేస్తున్నారు.