యూఏఈ: అక్రమాలు మరియు ప్రశ్నపత్రం లీకేజీ ఆరోపణల నేపథ్యంలో మే 3న జరిగిన అసలు పరీక్షను భారతదేశ జాతీయ పరీక్షల ఏజెన్సీ (ఎన్‌టీఏ) రద్దు చేసింది. దీంతో యూఏఈ లోని దాదాపు 1,800 నుండి 1,900 మంది విద్యార్థులు జూన్ 21న నీట్ యూజీ 2026 పునఃపరీక్షకు హాజరవుతున్నారు. 

భారతదేశంలోని అత్యంత పోటీతత్వ ప్రవేశ పరీక్షలలో ఒకటైన దీని సమగ్రతను కాపాడే లక్ష్యంతో, పటిష్టమైన భద్రతా చర్యలు మరియు కొన్ని సవరించిన విధానాల నడుమ ఈ పునఃపరీక్ష యూఏఈలోని దుబాయ్, షార్జా మరియు అబుదాబి అనే మూడు కేంద్రాలలో నిర్వహిస్తున్నారు. 

యూఏఈలోని వేలాది భారతీయ ప్రవాస కుటుంబాలకు, ఈ పునఃపరీక్ష మరింత సన్నద్ధతను, ఉత్కంఠకు గురిచేస్తోంది. ఎందుకంటే విద్యార్థులు మరోసారి వైద్య కోర్సుల ప్రవేశ పరీక్షకు సిద్ధమవుతున్నారు.  ప్రపంచవ్యాప్తంగా 22 లక్షలకు పైగా అభ్యర్థులు హాజరవుతుండటంతో, యూఏఈ అతిపెద్ద విదేశీ నీట్ పరీక్షా కేంద్రంగా నిలిచింది.

పునఃపరీక్ష ఎందుకు నిర్వహిస్తున్నారు?

ప్రశ్నాపత్రాలు లీక్ అయ్యాయనే ఆరోపణలపై రావడంతో, మే 3న జరగాల్సిన పరీక్షను NTA రద్దు చేసింది. లీక్ అయిన ప్రశ్నపత్రాలకు, అసలు పరీక్షకు మధ్య స్పష్టమైన సారూప్యతలను దర్యాప్తు అధికారులు కనుగొన్నారు. మే 12న సెంట్రల్ బ్యూరో ఆఫ్ ఇన్వెస్టిగేషన్ (CBI) ఈ దర్యాప్తును చేపట్టింది. పరీక్షా ప్రక్రియతో సంబంధాలున్నాయనే ఆరోపణలపై పూణేకు చెందిన ఒక రసాయన శాస్త్ర ప్రొఫెసర్‌తో సహా పలువురిని అరెస్టు చేశారు.

పునఃపరీక్ష కోసం ఏ మార్పులు అమలులో ఉన్నాయి?

పరీక్ష సమయాన్ని 180 నిమిషాల నుండి 195 నిమిషాలకు పెంచారు. అభ్యర్థులు వాస్తవంగా పరీక్ష రాసే సమయాన్ని కోల్పోకుండా ఉండేలా, సంతకాలు సేకరించడం, పరీక్ష సామగ్రిని పంపిణీ చేయడం మరియు తిరిగి తీసుకోవడం వంటి పర్యవేక్షణ ప్రక్రియల కోసం అదనంగా 15 నిమిషాలను కేటాయించారు.   మరిన్ని రఫ్-వర్క్ షీట్లను సులభంగా పొందగలగడం వల్ల కూడా విద్యార్థులు ప్రయోజనం పొందుతారని షార్జా ఇండియన్ స్కూల్ ప్రిన్సిపాల్ ప్రమోద్ మహాజన్ తెలిపారు. తమ కేంద్రానికి అదనంగా మరో 55 మంది విద్యార్థులను కేటాయించారని తెలిపారు. NTA (నేషనల్ టెస్టింగ్ ఏజెన్సీ) ముందుగానే ఒక లింక్‌ను అందుబాటులోకి తెచ్చి, పరీక్షా కేంద్రాలను మార్చుకోవాలనుకునే అభ్యర్థులు అలా చేసుకోవచ్చని సూచించిందని గుర్తుచేశారు. ప్రాంతీయ ఉద్రిక్తతల కారణంగా కొందరు తిరిగి రావడంతో తమ కేంద్రంలో విద్యార్థుల సంఖ్య పెరిగిందని ఆయన చెప్పారు.

భారత ప్రభుత్వం ఏమి చెప్పింది?

పరీక్షా ప్రక్రియకు భంగం కలిగించే లేదా దాని విశ్వసనీయతను దెబ్బతీసే ఏ ప్రయత్నంపైనైనా అధికారులు కఠిన చర్యలు తీసుకుంటారని భారత క్యాబినెట్ కార్యదర్శి డాక్టర్ టి.వి. సోమనాథన్ హెచ్చరించారు.  

NEET ఎందుకు అత్యంత ముఖ్యమైన పరీక్షలలో ఒకటి?

భారతదేశంలోని అనేక రకాల వైద్య కోర్సుల్లో ప్రవేశానికి NEET ఏకైక మార్గమని మహాజన్ చెప్పారు. "అర్హత సాధించిన వారు MBBS, BDS మరియు ఆయుర్వేద (BAMS) వంటి వైద్య కోర్సులతో పాటు BHMS మరియు BUMS వంటి ఇతర వైద్య విధానాల కోర్సుల్లోనూ ప్రవేశం పొందడానికి అర్హులవుతారు. యూఏఈలో NEET పరీక్ష నిర్వహించడం ఇది నాలుగవ ఏడాది." అని ఆయన తెలిపారు. 

యూఏఈలో NEET పరీక్షా నిర్వహణ ఎలా?

యూఏఈలో మూడు ప్రధాన పరీక్షా కేంద్రాలు ఉన్నాయి. దుబాయ్‌లోని ఇండియన్ హై స్కూల్‌లో సుమారు 900 మంది విద్యార్థులు, షార్జా ఇండియన్ స్కూల్‌లో 700 మందికి పైగా, అబుదాబి ఇండియన్ స్కూల్‌లో 300 మందికి పైగా అభ్యర్థులు పరీక్ష రాయనున్నారు. వీటన్నింటిలో కలిపి దాదాపు 1,800 నుండి 1,900 మంది అభ్యర్థులు పరీక్ష రాస్తుండటంతో, భారతదేశం వెలుపల NEET పరీక్షకు అతిపెద్ద కేంద్రంగా యూఏఈ నిలుస్తోంది.

ఎటువంటి భద్రతా చర్యలు అమలు చేస్తున్నారు?

పరీక్షా ప్రక్రియను పర్యవేక్షించడంలో అనేక అధికార యంత్రాంగాలు పాలుపంచుకుంటున్నాయని మహాజన్ చెప్పారు. సమన్వయ యంత్రాంగంలో భారత ప్రభుత్వం, కాన్సులేట్ జనరల్ కార్యాలయం మరియు రాయబార కార్యాలయం నుండి ప్రతినిధులు భాగస్వాములుగా ఉన్నారని ఆయన అన్నారు.

ప్రతి గదిలో మరియు ప్రతి అభ్యర్థికి వీడియో చిత్రీకరణ జరుగుతుంది. ఫ్రేమ్‌లో విద్యార్థి ముఖం, అడ్మిట్ కార్డు మరియు OMR షీట్‌తో పాటు స్పష్టంగా కనిపించాలి. అన్ని ప్రోటోకాల్‌లు సజావుగా పనిచేస్తున్నాయని నిర్ధారించుకోవడానికి, పరీక్షకు ఒక రోజు ముందు మాక్ డ్రిల్స్ మరియు ధృవీకరణ కార్యక్రమాలు నిర్వహించబడతాయన్నారు. 

పరీక్ష స్వరూపం, సమయం ఎంత?

పరీక్షా పత్రంలో ఫిజిక్స్ మరియు కెమిస్ట్రీలో చెరో 45 ప్రశ్నలు, బయాలజీలో 90 ప్రశ్నలు ఉంటాయి. ఈ పరీక్ష యూఏఈ కాలమానం ప్రకారం మధ్యాహ్నం 12.30 నుండి 3.45 గంటల వరకు నిర్వహించబడుతుంది. సాధారణంగా ఫలితాలను ఒక నెలలోపు ప్రకటిస్తారు.  

యూఏఈ పాఠశాలలు ఎలా సన్నద్ధమవుతున్నాయి?

సుమారు 900 మంది విద్యార్థులతో, ఇండియన్ హై గ్రూప్ ఆఫ్ స్కూల్స్ యూఏఈలో అతిపెద్ద నీట్ కేంద్రంగా ఉంది. నిష్పాక్షికత మరియు పారదర్శకతను నిర్ధారించడానికి ఎల్లప్పుడూ విస్తృతమైన ఏర్పాట్లు జరుగుతాయని సీఈఓ పునిత్ ఎంకే వాసు వివరించారు. కఠినమైన రెండు-అంచెల తనిఖీ విధానాన్ని అమలు చేస్తున్నట్లు తెలిపారు. 

పరీక్ష రోజు ఒత్తిడిని తగ్గించడం ఎలా?

అభ్యర్థులు మరియు వారి కుటుంబాలకు ఎదురయ్యే రవాణా సంబంధిత సవాళ్లను తగ్గించడంపై నిర్వాహకులు దృష్టి సారిస్తారని వాసు పేర్కొన్నారు. పరీక్ష రాసే దరఖాస్తుదారుల ఒత్తిడిని తగ్గించడానికి తమ పరీక్షా కేంద్రం మెట్రో స్టేషన్‌కు సులభంగా అందుబాటులో ఉంది మరియు తగినంత పార్కింగ్ సౌకర్యం కూడా ఉందని ఆయన అన్నారు. 

అభ్యర్థులకు ప్రవేశ నియమాలు ఏమిటి?

మధ్యాహ్నం 12 గంటలకు ప్రవేశ ద్వారాలు కచ్చితంగా మూసివేయబడతాయి. కాబట్టి, అభ్యర్థులు ముందుగానే హాజరు కావాలి. ఎట్టి పరిస్థితుల్లోనూ ఆలస్యంగా వచ్చేవారికి అనుమతి లేదు. విద్యార్థులు తమ అడ్మిట్ కార్డు, చెల్లుబాటు అయ్యే ఫోటో గుర్తింపు కార్డు మరియు సూచించిన ఫోటోలను తీసుకురావాలి.  

డ్రెస్ కోడ్, వస్తువులకు అనుమతి ఉందా?

తనిఖీ ప్రక్రియలను సులభతరం చేయడానికి అభ్యర్థులు తేలికపాటి దుస్తులు ధరించాలని NTA సూచించింది. పూర్తి చేతుల దుస్తులకు అనుమతి ఉంది. కానీ వాటిని ధరించిన విద్యార్థులు అదనపు తనిఖీ సమయం కోసం ముందుగానే రావాలి. పరీక్షా హాలులోకి పారదర్శక నీటి సీసాలతో సహా అత్యవసర వస్తువులను మాత్రమే తీసుకువెళ్లవచ్చు.

భద్రతా తనిఖీల సమయంలో ఆలస్యాన్ని నివారించడానికి తక్కువ మడమ ఉన్న చెప్పులు లేదా స్లిప్పర్లను సిఫార్సు చేస్తున్నారు. NTA మార్గదర్శకాల ప్రకారం అనుమతించబడిన ఏవైనా మతపరమైన వస్తువులను ముందుగానే తెలియజేయాలి. ప్రవేశానికి ముందు వాటిని అధికారులు పరిశీలిస్తారు.