షార్జా: షార్జాలోని కొన్ని ప్రాంతాల్లో కొనసాగుతున్న రహదారి నిర్మాణ పనులు, వేసవి సెలవుల కారణంగా అద్దె గృహాల డిమాండ్ తాత్కాలికంగా తగ్గింది. దీంతో పలువురు ఇంటి యజమానులు అద్దెలను తగ్గించడంతో పాటు ఒక నెల ఉచిత అద్దె వంటి ప్రత్యేక ఆఫర్లను ప్రకటిస్తున్నారు.

రియల్ ఎస్టేట్ ఏజెంట్ల ప్రకారం, అల్ తావూన్ రౌండబౌట్ మరియు అల్ ఖాన్ ప్రాంతాలకు సమీపంలోని భవనాలు రహదారి పనుల ప్రభావాన్ని ఎక్కువగా ఎదుర్కొంటున్నాయి. రాకపోకలు ఇబ్బందికరంగా మారడంతో కొంతమంది అద్దెదారులు మెరుగైన రోడ్డు సౌకర్యాలు ఉన్న సమీప ప్రాంతాలకు మారుతున్నారు.

ప్రస్తుతం అల్ తావూన్, అల్ ఖాన్ ప్రాంతాల్లోని అనేక అపార్ట్‌మెంట్లు ఈ ఏడాది ప్రారంభంతో పోలిస్తే తక్కువ అద్దెకు అందుబాటులో ఉన్నాయని చెబుతున్నారు.  కొన్ని భవనాల్లో వెంటనే నివాసానికి అవకాశం ఉండటంతో పాటు, కొత్త అద్దెదారులను ఆకర్షించేందుకు ఒక నెల అద్దె పూర్తిగా మాఫీ చేస్తున్నట్లు ఏజెంట్లు తెలిపారు.

షార్జాకు చెందిన రియల్ ఎస్టేట్ ఏజెంట్ ఆసిఫ్ మాట్లాడుతూ..  అపార్ట్‌మెంట్ కోసం విచారణ చేసే వారు ముందుగా రహదారి పనులు ఎప్పుడు పూర్తవుతాయనే విషయాన్నే అడుగుతున్నారని చెప్పారు. దీంతో కొందరు ఇంటి మార్పును వాయిదా వేస్తుండగా, మరికొందరు సులభమైన రాకపోకలు ఉన్న ప్రాంతాలను ఎంచుకుంటున్నారని వివరించారు.

ప్రస్తుతం వేసవి సెలవుల కారణంగా చాలా మంది యూఏఈ వెలుపల ఉండటంతో రహదారి పనుల ప్రభావం కొంత మేర తగ్గిందని రుక్న్ అల్ నఖీల్ రియల్ ఎస్టేట్ ప్రతినిధి మహ్మద్ అన్నారు. పాఠశాలలు తిరిగి ప్రారంభమైన తర్వాత కుటుంబాలు తిరిగి వస్తే అద్దె గృహాల డిమాండ్ మళ్లీ పెరిగే అవకాశం ఉందని అభిప్రాయపడ్డారు.

భవనాల సెక్యూరిటీ సిబ్బంది కూడా ఈ వేసవిలో ఖాళీ అపార్ట్‌మెంట్ల సంఖ్య పెరిగినట్లు తెలిపారు. కొందరు కుటుంబాలు స్వదేశాలకు వెళ్లే ముందు ఇళ్లు ఖాళీ చేసి, సెప్టెంబర్‌లో తిరిగి వచ్చాక కొత్త ఇల్లు వెతకాలని నిర్ణయించుకున్నట్లు చెప్పారు.

అలాగే, మరికొన్ని కుటుంబాలు సామాన్లు తరలించే ఇబ్బందులను తప్పించుకోవడానికి ఒకే అపార్ట్‌మెంట్‌లో ఫర్నిచర్‌ను భద్రపరచి, అద్దెను పరస్పరం పంచుకుంటున్నాయని వెల్లడించారు. రహదారి పనులు పూర్తయ్యాక పరిస్థితిని బట్టి మళ్లీ నివాసంపై నిర్ణయం తీసుకుంటామని అద్దెదారులు చెబుతున్నట్లు సెక్యూరిటీ సిబ్బంది తెలిపారు.