'విశారణై' పేరుతో విడుదలై సంచలన విజయం సాధించడంతోపాటు.. 'ఉత్తమ ప్రాంతీయ చిత్రం'గా జాతీయ అవార్డు అందుకున్న తమిళ చిత్రం.. 'విచారణ' పేరుతో తెలుగులో విడుదల కానుంది. ది క్రైమ్ అన్నది ట్యాగ్ లైన్. ప్రముఖ నిర్మాత సి.కళ్యాణ్ సమర్పణలో.. కల్పనాచిత్ర పతాకంపై ఈ చిత్రం తెలుగు ప్రేక్షకుల ముందుకు రానుంది. ఇంతకుముందు 'ఆదుకాలం'అనే చిత్రం రూపొందించి, ఆ చిత్రానికి కూడా జాతీయ అవార్డు అందుకున్న తమిళ సంచలనం వెట్రిమారన్ దర్శకత్వం వహించిన 'విచారణ' చిత్రం తమిళ్ వెర్షన్ కు ప్రముఖ హీరో ధనుష్ నిర్మాత కావడం విశేషం. ఓ ఆటో డ్రైవర్ జీవితంలో జరిగిన యదార్ధ సంఘటన ఆధారంగా రూపొందిన ఈ చిత్రం..రజినీ, కమల్ హాసన్ వంటి సూపర్ స్టార్స్ ప్రశంసలు అందుకుంది . ఇటీవలకాలంలో ఇంత గొప్ప చిత్రాన్ని తాము చూడలేదని పలువురు ప్రఖ్యాత దర్శకులు సైతం ఈ చిత్రంపై అభినందనల వర్షం కురిపించారు. ఈ చిత్రంలో హీరోయిన్ గా నటించిన ఆనందిని అఛ్చ తెలుగు అమ్మాయి కావడం మరో ముఖ్య విశేషం. జి.వి.ప్రకాష్ కుమార్ ఈ చిత్రానికి సంగీతం అందించగా దినేష్, ఆనంది, కిషోర్, ఆదుకాలం మురుగదాస్, సముద్రఖని, అజయ్ ఘోష్ పలువురు ముఖ్య పాత్రలు పోషించారు.