పాకిస్తాన్‌ను 'ఉగ్రదేశం'గా చివరకు అదే దేశంలోని బలూచిస్తాన్ ముద్ర వేసేసింది. తమ రాష్ట్రంలో దాదాపు 15 వేలకు పైగా కార్యకర్తలను అరెస్టు చేసినట్టు సైన్యం చెబుతోందని, కనీసం ఒక్క కేసు కూడా కోర్టుకు వెళ్లలేదని ఐక్యరాజ్యసమతి మానవ హక్కుల కమిషన్ లో బలూచిస్తాన్‌లోని రిపబ్లికన్ పార్టీ నేత బ్రహమదగ్ బుగ్తీ ఫిర్యాదు చేశారు. మానవ హక్కులను ఒకపక్క పాకిస్తాన్ తన దేశంలోనే దారుణంగా హరిస్తూ, మరోపక్క భారత్ పైకి ఉగ్ర మూకలను ఎగదోలుతోందని ఆయన విమర్శించారు. బలూచిస్తాన్ కు భారత్ ప్రధాని నరేంద్ర మోదీ మద్దతు ప్రకటించినందుకు ఆయన ధన్యవాదాలు తెలుపుతూ, మిగిలిన ప్రజాస్వామ్య దేశాలు కూడా బలూచిస్తాన్ కు మద్దతు తెలిపేందుకు ముందుకు రావాలని బుగ్తీ కోరారు. పాకిస్తాన్ లో బలూచిస్తాన్ ఎటువంటి పరిస్థితుల్లోనూ కలిసి ఉండలేదని ఆయన స్పష్టం చేశారు.